Disney anımatsııalyq fılmderindegi súıikti ánder qazaq tilinde oryndalady

NUR-SULTAN. QazAqparat - 27 jeltoqsanynda saǵat 15:00-de «ASTANA TV» telearnasynda «Juldyzdar sherýi» atty «Disney» kınokontserti televızııalyq formatta kórsetiledi. Onda anımatsııalyq fılmderdegi ánder qazaq tilinde shyrqalatyn bolady, dep habarlaıdy QazAqparat tilshisi.

Kınokontsert – bul bir mezgilde estradalyq-sımfonııalyq orkestr men áıgili oryndaýshylardyń súıemeldeýimen úlken ekrannan Disney fılmderiniń úzindilerin qaraý. Kınokontsert ereksheligi – onyń ınteraktıvti formatta ótetini. Mýzyka ekrandaǵy kórinispen dál sáıkes kelýi kerek, orkestrdiń tempi pen yrǵaǵy soǵan baılanysty.

«Juldyzdar Sherýi» kınokontsertiniń biregeı baǵdarlamasy Qazaqstan úshin arnaıy jasalǵan. Baǵdarlamaǵa barlyǵy aty ańyzǵa aınalǵan Disney-diń 11 anımatsııalyq fılminen qazaq tilindegi 22 kompozıtsııa kirdi: «Sulý men Qubyjyq», «Aladdın», «Moana», «Muzdy Ólke», «Arystan Patsha», «Mýlan» jáne basqalary. Fılmderdiń mýzykasyn tanymal kompozıtorlar, kóptegen syılyq ıegerleri: Hans Tsımmer, Alan Menken jáne Djerrı Goldsmıt jazǵan. Kınokontsertte oryndalǵan saýndtrekter 11 «Oskar» syılyǵyn alǵan.

Ánderdiń basym bóligi «Ózińnen basta» jobasy aıasynda qazaq tiline dýblıajdalǵan fılmderden alynǵan. Qalǵandary kınokontsert úshin qazaq tiline arnaıy aýdarylǵan.

Kınokontserttiń maqsaty – súıikti Disney keıipkerleri arqyly qazaq tilin jáne klassıkalyq mýzykany dáripteý.