«Dıplommen – aýylǵa»: BQO-da 400-ge jýyq mamanǵa baspana alýǵa nesıe berildi
BQO Ekonomıka jáne bıýdjettik josparlaý basqarmasynyń basshysy Tilepbergen Kaıýpov Óńirlik kommýnıkatsııalar qyzmeti alańynda málim etkenindeı, 1 qarashaǵa deıin 396 mamannyń 392-si bıýdjettik nesıe aldy.
Sondaı-aq jergilikti qazynadan aýylǵa kelgen 751 mamanǵa áleýmettik qoldaý kórsetýge 527,6 mln teńge bólinip, osy kezge deıin sonyń 705-i qarajatqa qol jetkizdi.
Oblysta baspana satyp alý úshin bıýdjettik nesıege muqtaj mamandar sany jyl saıyn artyp keledi. Máselen, 2009 jyldan bastap berilgen nesıeler sany 2,7 esege ósti.
QR Tuńǵysh Prezıdenti N.Nazarbaevtyń tapsyrmasyna sáıkes aýyldyń kadrlyq áleýetin arttyrý maqsatynda «Dıplommen – aýylǵa!» baǵdarlamasy 2009 jyldan bastap qolǵa alynǵan bolatyn.
T.Kaıýpovtyń sózine qaraǵanda, QR Úkimetiniń 2009 jylǵy 18 aqpandaǵy №183 qaýlysyna sáıkes aýylǵa joldama alǵan mamandarǵa 100 AEK mólsherinde bir rettik kóterme járdemaqy (2021 jyly – 291 700 teńge), turǵyn úıdi satyp alý nemese salý úshin 15 jylǵa deıingi jyldyq stavkasy 0,01 paıyzben 1500 AEK (2021 jyly – 4 375 500 teńge) kóleminde nesıe beriledi.
QR Ulttyq ekonomıka mınıstriniń 2020 jylǵy 30 qyrkúıektegi №72 buıryǵymen atalmysh jobaǵa aýyl, kent, aýyldyq okrýg ákimderi apparattarynyń memlekettik qyzmetshileri de qosyldy.
«Jalpy, 2009 jyldan 2021 jyldyń 1 qarashasyna deıin aýylǵa 7464 maman tartyldy, onyń ishinde 5027-si – muǵalim, 1410-y – densaýlyq saqtaý, 113-i – áleýmettik qamsyzdandyrý, 482-si – mádenıet, 186-sy – sport, 236-sy –agroónerkásip kesheni mamany jáne 10-y – memqyzmetshi. Osy jyldar ishinde áleýmettik qoldaý sharalaryna 2603,2 mln teńge qarajat bólindi. Oǵan qosa áleýmettik sala men agroónerkásiptik keshenniń 4110 mamany 12 836,3 mln teńge bıýdjettik nesıe aldy», - dedi T.Kaıýpov.
