«Dıplommen aýylǵa» tıimdiligin kórsetti — UEM

ASTANA. KAZINFORM – Bıyl «Dıplommen aýylǵa» baǵdarlamasy aıasynda 2,8 myńnan asa mamanǵa 25 mlrd teńge bıýdjettik kredıt beriledi. Bul týraly Ortalyq kommýnıkatsııalar qyzmetindegi brıfıngte Ulttyq ekonomıka vıtse-mınıstri Baýyrjan Omarbekov aıtty.

— Aýyldarda kadr tapshylyǵyn sheshý úshin «Dıplommen aýylǵa» jobasy iske sátti júzege asyrylyp jatyr. 2024 jyly 3,7 myń mamanǵa turǵyn úı satyp alýǵa 30 mlrd teńge kóleminde qarjy bólindi. Osy jyly 2,8 myńnan asa mamanǵa 25 mlrd teńge kóleminde bıýdjettik kredıt berý josparlanyp otyr. Jalpy, osy «Dıplommen aýylǵa» baǵdarlamasynyń tıimdiligin zerdelep kórdik. Osy ýaqytqa deıin berilgen bıýdjettik nesıelerdi, kóterme qoldaý alǵan azamattardyń 95 paıyzy ózderine alǵan mindettemelerin — 3 jyl jumysyn atqaryp, kópshiligi ary qaraı sol aýyldarda qyzmet etýge qalǵanyn kórip otyrmyz, — dedi Baýyrjan Omarbekov.

Sonymen qatar aýyldarda jańa bıznes ıdeıalardy júzege asyrýǵa qoldaý retinde 1,5 mlrd teńgege 400 grant berý josparlanyp otyrǵanyn aıtty.

Buǵan deıin «Dıplommen — aýylǵa» baǵdarlamasy aıasynda 49 myńǵa jýyq azamat turǵyn úı jaǵdaıyn jaqsartqanyn jazǵan edik.