Dına Tańsárini izdeý jalǵasyp jatyr - ІІM

ASTANA. KAZINFORM – «Ne molchı» qorynyń basshysy Dına Tańsárini izdeý jalǵasyp jatyr. Bul týraly Іshki ister mınıstri Erjan Sádenov aıtty.

- Iá, keıipker bizge belgili. Qylmystyq is qozǵaldy, kóptegen epızody bar. Oǵan izdeý jarııalanǵan, jumys istep jatyrmyz. Árıne, keltirgen shyǵyndy óteýi kerek. Zań bárine birdeı jumys isteýi qajet. Zań buzdyń ba, jaýap berýge tıissiń. Sondyqtan qazirgi ýaqytta izdeý júrip jatyr, - dedi mınıstr Májilistiń jalpy otyrysynan keıin BAQ ókilderiniń saýalyna oraı.

Sondaı-aq ol BAQ ókilderiniń «Kúdiktini Qazaqstan aýmaǵyna kelýine kóndiresizder me?» degen naqtylaý saýalyna jaýap berdi.

- Árıne, biz ony izdep jatyrmyz, - dep qysqa qaıyrdy Erjan Sádenov.

Eske sala ketsek, 2023 jyly 27 jeltoqsanda Іshki ister mınıstrligi quqyq qorǵaýshy, «Ne molchı» qorynyń basshysy Dına Tańsárige izdeý jarııalady.

Almaty qalasynyń, Shyǵys Qazaqstan jáne Almaty oblystarynyń Polıtsııa departamentteri oǵan qatysty kórineý jalǵan aqparat taratý, jeke ómirge qol suǵylmaýshylyqty buzý faktileri boıynsha 6 qylmystyq is qozǵap, tergep jatyr. 

Osy jyldyń sáýir aıynda Dına Tańsáriniń Chernogorııada ustalǵany jáne osy elden baspana suraǵany belgili boldy.