Dın ıÝn: CGTN Ortalyq Azııadaǵy BAQ-pen yntymaqtastyqqa aıryqsha mán beredi

ASTANA. KAZINFORM — Qytaılyq CGTN telearnasy Ortalyq Azııa elderiniń buqaralyq aqparat quraldarymen baılanysty tereńdetýge nıetti.

Bul týraly telearna bas redaktorynyń orynbasary Dın ıÝn Astanada ótip jatqan «Jahandyq ózgerister dáýirindegi Ortalyq Azııa. Strategııalyq damý quraly retindegi medıa» atty ІІ Ortalyq Azııa medıaforýmynda aıtty.

Dın ıÝnnyń aıtýynsha, BAQ halyqtar arasyndaǵy ózara túsinistikti jáne dostyqty tereńdetýde mańyzdy ról atqarady.

— Qytaı árqashan Ortalyq Azııa elderi senim artqan tatý kórshi, jaqsy seriktes jáne jaqsy baýyrlas boldy. CGTN óziniń mol jańalyqtary jáne aqparattarymen álemdik BAQ úshin mańyzdy aqparat kózi bolýǵa umtylady. Sonymen birge, biz barlyq eldiń bilimdi adamdary úshin ashyq dıalog pen ıdeıalar almasý alańyn qamtamasyz etýge daıynbyz, — dedi ol.

Sonymen qatar, Dın ıÝn qazirgi ýaqytta Ortalyq Azııa elderinde tabysty yntymaqtastyq qurǵanyn eske saldy.

— CGTN árqashan Ortalyq Azııadaǵy BAQ-pen yntymaqtastyqqa aıryqsha mán beredi. 2023 jyly Qytaı-Ortalyq Azııa birinshi sammıti qarsańynda CGTN Ortalyq Azııanyń bes eliniń BAQ ókilderimen birge Qytaı men Ortalyq Azııanyń joǵary deńgeıli medıa dıalogti onlaın rejımde sátti ótkizdi. Bul shara Qytaı-Ortalyq Azııa sammıtiniń negizgi is-sharalarynyń biri boldy. Ótken jyly biz ShYU Astana sammıtinde Ortalyq Azııa elderindegi áriptesterimizben tabysty jumystar atqardyq, — dedi Dın ıÝn.

CGTN telearnasy bas redaktorynyń orynbasary Ortalyq Azııadaǵy BAQ-pen yntymaqtastyqty odan ári tereńdetý jáne obektıvti ári ádil halyqaralyq qoǵamdyq pikir landshaftyn qurý úshin óz usynysyn aıtty.

— Birinshiden, biz medıa yntymaqtastyǵy úshin jańa ádisterdi, arnalardy jáne mazmundy jańartyp, Qytaı men Ortalyq Azııa yntymaqtastyǵy úshin úles qosýymyz kerek. Sońǵy jyldary Qytaı-Orta Azııa qarym-qatynastary men aımaqtyq damý qarqyndy ómirsheńdigin kórsetti. Biz Qytaı men Ortalyq Azııa arasyndaǵy dostyq qarym-qatynas tarıhyn jáne «Bir beldeý, bir jol» bastamasy aıasyndaǵy yntymaqtastyq tarıhyn birlesip baıandaý úshin Qazaqstanda ótetin «Qytaı-Ortalyq Azııa» sammıtiniń múmkindigin paıdalana otyryp, Ortalyq Azııadaǵy BAQ-pen birlesip jumys isteýge daıynbyz, — dedi ol.

Halyqaralyq qoǵamdyq pikir keńistiginde ártúrli úılesimdilik jáne aıyrmashylyqtardy saqtaı otyryp, ortaq negiz izdeýdiń kommýnıkatsııalyq qundylyq tujyrymdamasyn belsendi túrde qoldaý — ekinshi usynys.

— Úshinshiden, biz jańalyqtar men shyndyqtyń qorǵaýshysy bolýymyz kerek. Salaýatty, ártúrli jáne jaqsy uıymdastyrylǵan mazmun ekojúıesin qurý úshin barlyq medıa seriktestermen jumys isteımiz dep úmittenemiz. IA dáýiriniń synaqtary men múmkindikterin birge eńserý úshin ortaq maqsatta jumys isteıik. Biz IA tehnologııasynyń mazmundy ınnovatsııaǵa baǵyttalýyn, aqparattyń shynaıylyǵy men tıimdiligin qamtamasyz etýimiz kerek. Qytaıda «Uly izgilik ústemdik qursa, dúnıe bárine ortaq bolady» degen maqal bar. Biz barlyq eldiń medıa áriptesterimen ınklıýzıvtilik pen túsinistikti qoldaý, ózara tıimdi yntymaqtastyqty ilgeriletý úshin jumys isteımiz dep úmittenemiz, — dedi Dın ıÝn.

Osyǵan deıin Mádenıet jáne aqparat mınıstri Aıda Balaeva qazaqstandyq serıaldar men fılmder TMD, Eýropa jáne Azııa elderine eksporttalyp jatqanyn aıtty.