Din salasyndaǵy qyzmetter avtomattandyryldy - Erjan Núkejanov
«Qazirgi kezde elimizde dinı ahýal turaqty dep senimmen aıtýǵa bolady. Aqparat jáne qoǵamdyq damý mınıstrligi múddeli memlekettik organdarmen birlesip, osy salada júıeli jumystar atqarýda», - dep toqtaldy komıtet basshysy atalǵan mınıstrliktiń keńeıtilgen alqa májilisinde.
Osy oraıda ol profılaktıkalyq is-sharalarǵa toqtaldy.
«Bizdiń taǵy bir mańyzdy jumys baǵytymyz - halyqtyń dinı-radıkaldy ıdeologııalarǵa qarsy ımmýnıtetin nyǵaıtý. Bul baǵyttaǵy jumystar qaıta qarastyrylyp, bizde negizgi basymdyqtar belgilendi. Sandyq kórsetkishten sapalyq nátıjege basty nazar aýdaryp otyrmyz. Buryn profılaktıkalyq jumystar jalpylama júrgiziletin bolsa, qazir kóbine qurylys alańdarynda, vahtalyq tásilmen isteıtin azamattardyń arasynda qolǵa aldyq. Sonymen qatar bazarlar qamtylǵan. Óıtkeni dinı-radıkaldy ıdeologııanyń taralýy zertteý boıynsha sol jerlerde shoǵyrlanǵan. Bul jumysty basty nazarda ustap turmyz», - dedi komıtet tóraǵasy.
Sonymen qatar ol tsıfrlandyrý baǵytyndaǵy jumystardy atady.
«Tsıfrlandyrý baǵytynda tıisti jumystar atqarylyp jatyr. Din salasynda 7 qyzmet kórsetemiz, ótken jyly biz altaýyn avtomattandyrdyq. Bul bir jaǵynan sybaılas jemqorlyqqa qarsy, ekinshi jaǵynan tsıfrlandyrýdy damytýǵa qatysty. Endi bir qyzmet qalyp tur, ony avtomattandyrýdy bıyl aıaqtaımyz. Osy oraıda bizdiń salada jalpy tsıfrlandyrýdy 100 paıyzǵa jetkizbekpiz», - dedi E. Núkejanov.
