Dımashtyń Londondaǵy kontsertinde án shyrqaıtyn aqtóbelik oqýshy kim
Bıyl Aqtóbe oblysynda Balalar jyly jarııalanyp, «Baqytty bala» vokaldyq baıqaýy uıymdastyryldy. Bul baıqaýdyń qonaǵy ári táýelsiz baqylaýshy bolǵan ánshi Dımash Qudaıbergen atalmysh baıqaýda kóńilinen shyqqan ánshi qyz Narǵyz Januzaqovaǵa erekshe syı jasady. Ol Londondaǵy kontsertinde aqtóbelik oqýshynyń da án shyrqaıtynyn aıtyp, ónerpazdy qýanyshqa bóledi.
Sodan beri juldyzdy kúndi taǵatsyzdana kútip júrgen Narǵyzǵa mınıstrlikten telefon shalyp, Londonǵa baratynyn habarlady. Erteń jas ánshi Astana qalasyna baryp, Dımash Qudaıbergennen birneshe vokaldyq sabaq alady. Ári qaraı London sahnasy kútip tur.
«Narǵyz 6 jasqa tolmaı mektep tabaldyryǵyn attady. Sol kúnnen bastap «apaı, án aıtaıyn» dep usynys jasaǵan. Kishkentaıynan baıqaýlarǵa qatysyp, 7 jasynda Almaty qalasyna bardy. Qyzym vokaldan sabaq alyp, notany úırenbeı-aq, júrek qalaýymen án shyrqady. Tek 2016 jyldan bastap jeke mektepte vokaldan sabaq alyp júr. Birinshi ustazy - Gúlgúl Nurlanqyzy. Ol bıyl «Baqytty bala» baıqaýyna qatysty. Dál osy baıqaýda Dımash notalyq saýattylyǵyn arttyryp, mýzykalyq bilim alýdy usyndy. 2018 jyldyń qyrkúıeginen bastap Qazanǵap atyndaǵy balalar óner mektebine bardy. Qazir vokal men fortepıano úıirmesine qatysyp júr», - deıdi Narǵyzdyń anasy Syrǵagúl Januzaqova.
Aqtóbe qalasyndaǵy «Nur Aqtóbe» aýdanynda ornalasqan orta mekteptiń 8-synyp oqýshysy Almaty, Astanada ótip jatqan baıqaýlardan jıi bas júlde alady. Máselen, «Ǵumyrdarııa» baıqaýynda ІІ oryn alsa, «Aınalaıyn», «Boztorǵaı», «Jas talant», «Álem talant Stars» baıqaýlarynda bas júldeni ıelendi. Kompozıtor Ermek Elgezekov «Aqtóbem» ánin jazyp berdi. Qazir Narǵyz Januzaqovanyń repertýarynda bul án bar.
«Marqum kúıeýim dombyra tartyp, án aıtatyn. Narǵyzdyń ákesi «qyzymnyń daýysy zor, bir kúni jarq etedi» dep jıi aıtyp, ózi daıyndady. 2014 jyly ákesi kóz jumǵan kezde Narǵyz «kimge arnap án aıtam» dep múlde mýzykaǵa qaramady. Apasy «ákeń kóredi, án aıt» dep kóndirip, mektepte qaıtadan án aıtty. «Baqytty bala» baıqaýynda da «Bol» ánin ákesine arnady. Gran-prı men kontsertte án shyrqaý qurmetine ıe bolǵanda qatty tańqaldym, qýandym. Naǵyz talanttyń óz baǵasyn alǵany kóńilge senim uıalatady. «Notany bilmese de dál túsip, ándi júreginen ótkizip aıtady» dep ádilqazylar aıtty»,- deıdi Syrǵagúl Januzaqova.
Narǵyz Januzaqova halyqaralyq baıqaýlarǵa óz ánin jiberip, irikteýden ótkenimen, ári qaraı jolaqysy men jatyn ornyn tóleýge qınalyp, talaı shaqyrýdy keri qaıtardy. Jas talant shetelge birinshi ret jolǵa shyqpaq. Ol úlken sahnanyń qyr-syryn ınternetten qarap, tanysyp, meńgerýde.
«Indigo at the O2 kontsert zaly týraly ınternetten qarap, bildim. Munda álemge tanymal ánshiler án shyrqaǵan eken. Men ol sahnada «Elimniń júregi - Astana» ánin oryndap, Qazaqstandy kórermenge tanystyramyn», - dedi Narǵyz Januzaqova.
Aǵylshyn tilin jaqsy meńgergen oqýshy saparǵa shyqpas buryn óz bilimin taǵy bir pysyqtap aldy. Ári Dımash Qudaıbergenniń kontsertinde án shyrqaıtynyn estigen jankúıerler álemniń ár túkpirinen habarlasyp, áleýmettik jeli arqyly tanysyp jatyr.
«Kóp adam baıqaýlarǵa kúsh jumsamaýǵa keńes berdi. Ásirese, daýys kútý mańyzdy. Tańerteń daýysymdy ashý úshin aıqaılap alamyn, sabaqtan shyqqan soń bir saǵatymdy ánge arnaımyn. Ózim qazaq, orys, aǵylshyn tilderinde án shyrqaımyn. Aǵylshyn tilin meńgerý esh qıyndyq týǵyzbady»,- deıdi ol.
Anasy Syrǵagúl Januzaqovanyń aıtýynsha, tájirıbeli mamandar áleýmettik jeli arqyly tanylý týraly jıi aıtady. Biraq Narǵyz áleýmettik jeli arqyly emes, shynaıy ónerimen tanylýdy armandaıdy.
Aıta keteıik, jas talant prodıýser Baǵym Muhıtdınovaǵa baryp, taǵy bir sabaq alǵan. Ol Narǵyzdy tyńdaǵan soń vokaldy meńgerip, daýys kútimin esten shyǵarmaýǵa keńes berdi. Tipti, 12 jastaǵy oqýshynyń 18 jastaǵy ánshi sekildi án aıtýy Baǵym Muhıtdınovany tańqaldyrǵan. Sýret salyp, án aıtqandy unatatyn Narǵyz Januzaqova ánshi ári dızaıner bolýdy armandaıdy.
