Dımashtyń búgingi fan-kezdesýine 40-tan astam elden jankúıerler keledi
ALMATY. KAZINFORM — Búgin Dımash Qudaıbergen Almaty Arena-da jankúıerlerimen júzdesedi. Fan-kezdesýge 8 myńǵa jýyq adam jınalmaq. Odan bólek, 40-tan astam memleketten Dımashtyń ónerin súıetin tyńdarmandar keledi dep josparlanǵan.
Kópten kútken kezdesýge uıymdastyrýshylar qalaı daıyndalyp jatyr? Jankúıerlerdi ne kútip tur? «Búgin LIVE» baǵdarlamasy tikeleı efırde dál osy suraqtarǵa jaýap berdi.
— Alǵashynda bul jaı fan-kezdesý bolady dep josparlanǵan. Biraq arty úlken kontsertke ulasyp jatyr. Sondyqtan aıaq astynan qyzý daıyndyqty bastap kettik. Búgin keremet kesh bolady. Dımash jankúıerlerimen biraz suhbattasady. Jan-jaqtan kelgen tyńdarmandardyń suraqtaryna jaýap beredi, — deıdi kontsert rejısseri.
Nazgúl Qarabalına búgingi keshte Dımashtan bólek taǵy qandaı jaryq juldyzdar óner kórsetetinin aıtty.
— Búgin biraz kesh qonaqtary bar. Dımash ózi sahnaǵa birge shyǵaıyq dep arnaıy elimizdiń jaryq juldyzdary Sáken Maıǵazıev, Sadraddin, Kesh You toby, Aqbota-Nur, Ernar Amandyq, Dastan Orazbekov syndy ónerpazdardy shaqyrdy, — deıdi uıymdastyrýshy.
Esterińizde bolsa, ótken jyly qarashada Dımash Qudaıbergenniń Stranger atty kontserttik shoýy ótken edi. Dál sol keshtiń fılm nusqasy 27 mamyrdan bastap Qazaqstannyń barlyq kınoteatrlarynda kórsetiledi. Uıymdastyrýshylar búgingi sharada osy kınotýyndyǵa aktsent beriletinin aıtady.
Aıta keteıik, birer kún buryn Dımash Qudaıbergenniń Polshadaǵy jankúıerleri ánshiniń týǵan kúnine oraı aǵash otyrǵyzdy.
Odan bólek, Brazılııada Dımashtyń sýretimen bezendirilgen avtobýstar paıda boldy.