Dımash Qudaıbergen taǵy bir qurmetti ataqqa ıe boldy

ALMATY. KAZINFORM — Álemge áıgili ánshi, Qazaqstannyń halyq ártisi Dımash Qudaıbergen Sanjar Asfendııarov atyndaǵy qazaq ulttyq medıtsına ýnıversıtetiniń qurmetti professory atandy.

Ýnıversıtet rektory Marat Shoranov Dımash Qudaıbergenge mádenıetti damytýǵa, jastardyń rýhanı tárbıesine qosqan úlesi jáne Qazaqstannyń halyqaralyq ımıdjin ilgeriletýdegi eńbegi úshin QazUMÝ-dyń qurmetti professory ataǵyn tabystady.

Dımash Qudaıbergen kezdesýde óziniń ómirlik jáne shyǵarmashylyq joly týraly oı bólisti. Ol ulttyq mádenıetten ajyramaı, álemdik sahnalarǵa qalaı jetkenin aıtyp berdi.

— Adamdy eń áýeli rýhanı baılyǵy úshin baǵalaımyn. Talant pen kásibı qabilet — odan keıingi nárse. Eger ishki negiz bolmasa, qandaı jetistikke jetseń de, onyń salmaǵy sezilmeıdi, - dedi Dımash.

Dımash Qudaıbergen QazUMÝ stýdentterinen quralǵan «Dala sazy» ulttyq aspaptar ansamblimen birlesip óner kórsetti. Olar «Adaı» kúıin birge oryndady.

Halyq ártisi stýdentterge aldaǵy emtıhan sessııasyn sátti tapsyrýǵa tilektestigin bildirdi.

Eske salaıyq, buǵan deıin Dımash Qudaıbergen Birikken Ulttar Uıymynyń Halyqaralyq kóshi-qon boıynsha uıymynyń (IOM) jahandyq izgi nıet elshisi bolyp taǵaıyndalǵanyn jazǵanbyz.