Dımash Almatyda jankúıerlerimen kezdesti
ALMATY. KAZINFORM — Almaty Arena kesheninde Dımash Qudaıbergen Qazaqstan men álemniń túkpir-túkpirinen kelgen jankúıerlerimen kezdesti.
Búgin Almatyda «Stranger» kontsertiniń kınoteatrlarǵa shyǵýyna oraı uıymdastyrylatyn «D and Dears» atty fan-kezdesý ótip jatyr.
Onda Dımashtyń jankúıerleri ónerpazǵa tikeleı suraq qoıyp, onyń shyǵarmashylyǵyna arnalǵan shoýdy tamashalady.
Eń áýeli Dımash Qudaıbergen fan-kezdesýinde KSRO jáne Qazaqstan halyq ártisi Bıbigúl Tólegenovaǵa qońyraý shalyp, batasyn aldy.
Sondaı-aq erekshe keshte Sáken Maıǵazıev, Sadraddin, Kesh You toby, Aqbota-Nur, Ernar Amandyq, Dastan Orazbekov jáne ózge de qazaqstandyq ánshiler óner kórsetip jatyr.
— Búgin osy jerde kezdesip otyrǵanyma sheksiz qýanyshtymyn. Sizderdiń qoldaýlaryńyz men úshin úlken shabyt. Bul kesh bárimiz úshin umytylmas kesh bolatynyna senimdimin. Ózderińizben osy sátti bólisip otyrǵan mende arman joq, — dedi Dımash Qudaıbergen.
Uıymdastyrýshylar málimetine sáıkes, fan-kezdesýge 8 myńǵa jýyq adam jınalǵan.
Eske salaıyq, 27 mamyrdan bastap Astanada ótken «Stranger» shoýy elimizde alǵash ret kınoteatrlarda kórsetiledi.
Buǵan deıin Dımashtyń búgingi fan-kezdesýine 40-tan astam elden jankúıerler kelgenin jazǵanbyz.
Osy aıda Dımash Qudaıbergen belgili qazaq aqyny ári jazýshysy, qazaq ádebıetiniń negizin salýshylardyń biri Sáken Seıfýllınniń ánine túsirilgen jańa beınebaıannyń tusaýyn kesti.