Dıqandar bir lıtr dızel otynyn 202 teńgeden satyp alýda - AShM

NUR-SULTAN. QazAqparat – Dıqandar dızel otynynyń bir lıtrin 202 teńgeden alyp jatyr. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Aýyl sharýashylyǵy taýaryn óndirýshilerdiń egin jınaý jumystaryn ýaqytyly júrgizýi úshin 423,5 myń tonna jeńildetilgen dızel otyny bólindi. Energetıka mınıstrligimen birlesip, oblys operatorlaryn munaı óńdeý zaýyttaryna bekitip berý kestesi jasaldy. Shilde aıyndaǵy kólemderin óńirler tolyǵymen aldy. Qazirgi ýaqytta tamyzǵa eseptelgen janarmaı kólemi tıelip, aımaqtarǵa jóneltilýde», - dedi mınıstr.

Onyń aıtýynsha, Energetıka mınıstrligi tamyz aıyna hattamamen munaı óńdeý zaýyttarynan shyǵarylatyn mynadaı ortasha naryqtyq baǵa belgiledi – tonnasyna 212,0 myń teńge nemese lıtrine 177 teńge.

«Operatorlardyń shyǵystaryn eskere otyryp, Aýyl sharýashylyǵy taýaryn óndirýshiler úshin respýblıka boıynsha ortasha baǵa lıtrine 202 teńgeni quraıdy», - dedi Erbol Qarashókeev.

Foto: economictimes.indiatimes.com