Dıhan Qamzabekuly: Abaı kúni – rýhanı temirqazyq kúni

NUR-SULTAN. QazAqparat – Belgili ǵalym, L.Gýmılev atyndaǵy Eýrazııa ulttyq ýnıversıtetiniń prorektory, fılologııa ǵylymdarynyń doktory, QR UǴA akademıgi Dıhan Qamzabekuly Abaı kúni merekesiniń máni týraly pikir bildirdi, dep habarlaıdy QazAqparat tilshisi.

Elordadaǵy Abaı eskertkishine taǵzym etýge jınalǵan zııaly toptyń arasynda belgili ǵalym, ustaz Dıhan Qamzabekuly da bolǵan edi. Shara aldynda L.Gýmılev atyndaǵy Eýrazııa ulttyq ýnıversıtetiniń prorektory Abaı kúniniń resmı mereke retinde qalaı toılanýy kerektigi týraly oıyn aıtty.

«Abaı – biz úshin rámizdik tulǵa. Abaıdyń aty, zaty, murasy ultpen birge jasaı beredi. Sondyqtan Úkimet, ar jaǵynda eldiń basshysy, zııaly qaýym Abaıǵa arnaıy kún arnaǵan kezde rýhanı turǵyda da, zattyq turǵyda da bereke-birlikke bastaıtyn kún bolýyn kózdese kerek. «Rýhanı jańǵyrý» dep jatamyz ǵoı, Abaı arqyly sonyń mánin bilý de bul kúnniń enshisindegi sharýa. Rýhanı jańǵyrý degen – jaı ǵana bir sharalar nemese esep berý emes, ózimizde bardy uqsata bilý. Óz muramyzǵa baılanysty ózimizdiń ustanymymyz bolǵanda ǵana rýhanı jańǵyrǵan bolyp eseptelemiz. Bul urpaq sabaqtastyǵymen, bilimmen keletin dúnıe. Biz ádette naýqanshyldyqqa ketip qalamyz. Ondaı bolmaýy kerek. Abaıdyń «Bes nárseden qashyq bol, bes nársege asyq bol» degen uǵymynyń kontseptsııasynyń ózi – «Tolyq adam» tulǵasyna, qoǵamdy kemeldikke jumyldyrý», - dedi fılologııa ǵylymynyń doktory.

Sondaı-aq, ol Abaı ilimi arqyly jas býyndy adal urpaq etip tárbıeleý qazirgi býyn aldyndaǵy mindet ekenin atady.

«Qoǵam qashan da jaqsylyqqa qaraı júredi. Biz qazir álemde, óz ishimizde qandaı qıyndyqtar bolsa da, ósetin, ónetin múmkindik izdeýimiz kerek. Sonymen birge ultty jumyldyra otyryp, qoǵamnyń bereke-birligine qyzmet etetin, qoǵamnyń aldaǵy kezeńin anyqtaıtyn jastardy keshegi adal urpaqtyń jalǵasy etýge kúsh salýymyz kerek. Oǵan jastar da senimdi, jastar da peıildi. Abaı sonyń báriniń arasynda altyn kópir bolyp otyr. Abaıdyń murasy da, muraty da, onyń altyn arqaýy da osynda. Abaı ultpen birge jasaıdy. Búgingi kún – ultymyzdyń kúni, rýhanı jetistikterimizdiń kúni, rýhanı temirqazyq kúnimiz. Ultymyzdy, halqymyzdy osy merekemen quttyqtaımyz. Abaıdyń talǵamy, Abaıdyń sezimi, Abaıdyń júregi, Abaıdyń naqyly bizdiń ultty ósirip otyrady», - deıdi Dıhan Qamzabekuly.