Digital Almaty-2025: tsıfrlyq forýmǵa 40 myńnan asa adam qatysady
ALMATY. KAZINFORM — Almatyda 31 qańtar men 1 aqpan aralyǵynda VII Halyqaralyq Digital Almaty 2025 halyqaralyq forýmy ótedi. Forým ónerkásiptegi túbegeıli ózgerister men jasandy ıntellektiniń jahandyq ındýstrııa keleshegine arnalady.
Forým aıasynda EAEO elderi premer-mınıstrleriniń plenarlyq otyrysy ótedi. Tsıfrlyq jıynǵa Ázerbaıjan, Belarýs, Qyrǵyzstan, Reseı, Tájikstan, Ózbekstan, Armenııa, Iran elderiniń úkimet basshylary men Eýrazııalyq ekonomıkalyq komıssııa ókilderi qatysady.
Tsıfrlyq álemmen tanystyratyn ekikúndik sharaǵa 40 myńnan asa adam qatysady dep kútilýde.
Dástúrli startap alleıasy 80 halyqaralyq ınnovatsııalyq jobany usynatyn bolady. Bul myńdaǵan qatysýshyǵa, sonyń ishinde ınvestorlarǵa jańa ıdeıalarmen tanysýǵa múmkindik beredi. «Indýstrııa X» aımaǵynda qazaqstandyq tehnologııalyq kompanııalar iri ónerkásiptik kásiporyndarda júzege asyrylǵan tabysty jobalardy kórsetedi.
Otandyq jer qoınaýyn paıdalanýshylar men AQSh, Reseı, Belarýs, Tájikstan jáne Irannyń tehnoparkteri paneldik sessııalar aıasynda jasandy ıntellekttiń óndiristik protsesterde qalaı qoldanylatynyn baıandaıdy
Forýmǵa álemdik deńgeıdegi sarapshylar, onyń ishinde Rıchard Stırlıng (CEO Oxford Insights), Endrıý Yn (DeepLearning.AI negizin qalaýshy), Sol Kempbell (aǵylshyn fýtbolynyń ańyzy, «Arsenal» fýtbol klýbynyń burynǵy oıynshysy), ıAn Lekýn (Tıýrıng syılyǵynyń laýreaty), Kaan Terzıoglý (VEON Bas dırektory), Todzıý Dıýk (Bedrock AI jáne Diverse AI kompanııalarynyń negizin qalaýshy jáne bas dırektory), Nık Davydov (venchýrlyq ınvestor, DVC qorynyń teń quryltaıshysy jáne seriktesi), Ioram Vııngaarde (Dealroom kompanııasynyń negizin qalaýshy jáne CEO) jáne basqa da ІT jáne tehnologııalar salasyndaǵy jetekshi kompanııalar men uıymdardyń ókilderi qatysady.
Sondaı-aq, jalpy otyrys sheńberinde Digital Almaty Awards 2025 dástúrli syılyǵy tabystalady.
Astana Hub — AI Movement bastamasynyń qorytyndylary shyǵarylyp, FIRST Tech Challenge respýblıkalyq kezeńi ótedi, onda 24 úzdik mektep komandasy Digital Ministry Cup úshin baq synaıdy. Forýmnyń mańyzdy oqıǵalarynyń biri Industrial AI Battle — AI jáne tsıfrlyq transformatsııa salasyndaǵy startaptar arasyndaǵy báseke bolady.
Qatysýshylar $60 000 júlde qory men forým seriktesteriniń granttary úshin jarysatyn bolady.
Eske sala keteıik, Digital Almaty uıymdastyrýshylary: Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrligi, Qazaqstan Respýblıkasynyń Syrtqy ister mınıstrligi, Almaty qalasynyń ákimdigi jáne «Innovatsııalyq tehnologııalar parki» derbes klasterlik qory.
Osyǵan deıin Almatyda forým kezinde kólik qozǵalysy ishinara shekteletini týraly jazǵan edik.