Dıdar Smaǵulov bıylǵy UBT kezindegi qatań tártip týraly aıtty

NUR-SULTAN. QazAqparat – Bıyl UBT-dan keıin barlyq aýdıtorııalardan jazylǵan vıdeolar tekseriledi. Bul týraly Ulttyq testileý ortalyǵynyń dırektory Dıdar Smaǵulov málim etti, dep habarlaıdy QazAqparat tilshisi.

«Bıyl Ulttyq biryńǵaı testileýdi ótkizýdiń jańashyldyqtaryna toqtalsaq, baqylaý sharalary kúsheıtildi. Eger ǵımaratqa kirgizý barysynda tyıym salynǵan zattar, ıaǵnı smartfondar, jazba qaǵazdary jáne basqa da quraldar tabylsa, onda test tapsyrýshy emtıhanǵa jiberilmeıdi. Kez kelgen adam UBT-nyń ótýi barysyn kóre alady. Kórsetilim siltemesi UBT jaqyndaǵanda jarııalanady», - dedi D. Smaǵulov Ortalyq komýnıkatsııalar qyzmetinde.

Onyń sózine qaraǵanda, ár aýdıtorııada beınebaqylaý ornatylady.

«Barlyq beınejazbalarǵa 25 tamyzǵa deıin taldaý júrgiziledi. UBT ótkizý qaǵıdalarynyń buzylýy anyqtalǵan jaǵdaıda, ıaǵnı kóshirý nemese basqa da áreketter baıqalsa, testileý nátıjeleri joıylady. Sonymen qatar, bilim berý grantyn taǵaıyndaý konkýrsynyń nátıjeleri de joıylýy múmkin», - dep túsindirdi ortalyq basshysy.

Onyń aıtýynsha, UBT ótkizý barysynda baqylaýdy qamtamasyz etetin ókildermen úshjaqty kelisimder jasalady. Baqylaý tek test tapsyrýshylarǵa ǵana emes, sondaı-aq baqylaýshylarǵa da júrgiziledi.

«Ár adam UBT ótý barysyn baqylaı alady jáne ereje buzý anyqtalsa, dereý Ulttyq testileý ortalyǵyna habarlasýǵa bolady», -dedi Dıdar Smaǵulov.

Budan buryn habarlanǵandaı, Dıdar Smaǵulov bıylǵy UBT-ny ótkizý tártibi jaıynda túsinik berdi.

Bıyl Ulttyq biryńǵaı testileý 20 maýsym men 5 shilde aralyǵynda ótedi.