Depýtattar Ónerkásip mınıstrin synǵa aldy
ASTANA. KAZINFORM — Búgin Parlament Májilisinde ónerkásiptik saıasat taqyrybyn talqylaýǵa arnalǵan Úkimet saǵatynda depýtattar Ónerkásip jáne qurylys mınıstri Qanat Sharlapaevty synǵa aldy.
Atap aıtqanda, Májilis depýtaty Baqytjan Bazarbek Ónerkásip mınıstriniń (Qanat Sharlapaevtyń) jaýapkershiligi máselesin kóterýdi surady. Ol Parlament Májilisindegi búgingi Úkimet saǵatynda depýtattardyń saýalyna tıisti deńgeıde áreket etpegen.
«Siz Parlamentke depýtattardyń aldynda esep berýge keldińiz. Sondyqtan suraqtarǵa jaýap berińiz», - dedi B. Bazarbek mınıstrge qarata aıtqan sózinde.
Sonymen qatar áriptesiniń sózin Májilis depýtaty Murat Ábenov te qoldady.
«Búgin 5 suraq qoısam da, eshqaısyna jaýap almadym. Búgin mınıstr ne úshin keldi?! Úkimet saǵatynda problemany ortaǵa salyp, shyndyqty aıtýy kerek. Byltyr 170 joba iske asyrylyp, zaýyttar jumysyn bastaýy kerek edi. Segizi ǵana akt boıynsha iske qosyldy. Búgin sonyń jaýabyn alǵymyz keldi, biraq aqparat bolmady. Sebepteri men problemalary qandaı? Kimdi jaýapqa tartamyz? Mınıstrler aldymyzda turyp, jalǵan aqparat berip tur. Qarjy týraly bir esep bermedi... Jalpy, búgin 2 saǵat ýaqytymdy bosqa jumsadym dep esepteımin, ıaǵnı paıdaly aqparat almadym», - dedi M. Ábenov.
