«Depýtattar elde demalady» - baspasózge sholý
***
Bıylǵy jyldyń úlesindegi ındýstrııalandyrý jobalarynyń qatarynda «Qazteleradıo» AQ-tyń tehnologııalyq múmkindikteri nátıjesinde júzege asqan «Telegazet» jobasy da bar. Osy joba aıasynda «Egemen Qazaqstan», «Kazahstanskaıa pravda» gazetteri elimizdiń tarıhynda tuńǵysh ret «Otaý TV» ulttyq telehabar taratý jelisi arqyly óz oqyrmandaryna jedel jetý múmkindigine ıe boldy. Osy oqıǵaǵa oraı «Egemen Qazaqstan» basylymy «Qazteleradıo» AQ basqarma tóraǵasy Abaı Qadyralıevpen aradaǵy suhbatty usynyp otyr. «Telegazet» qyzmetin ázirleý ıdeıasy Memleket basshysy Nursultan Nazarbaevtyń qala men aýyl arasyndaǵy aqparattyq teńsizdikti joıý jóninde Úkimetke bergen tapsyrmasyna sáıkes paıda boldy. Osy tapsyrma negizinde biz «OtaýTV» spýtnıktik teleradıo habarlaryn taratýdyń ulttyq jelisiniń qyzmeti Qazaqstannyń kez kelgen núktesine qoljetimdi ekendigin, al otandyq tsıfrlyq efırlik telehabar taralymyn otandastarymyzdyń 50 paıyzy kóre alatyndyǵyn eskere otyryp, «Egemen Qazaqstan», «Kazahstanskaıa pravda» sekildi elimizdiń basty basylymdaryn óz oqyrmandaryna jedel jetkizý jobasyn júzege asyrýdy qolǵa alǵan edik. Sonyń ishinde elimizdiń shetkeri óńirlerinde ornalasqan eldi mekender halqy da bar. Mine, osy jurtshylyq qazirgi kúni elimizdiń joǵaryda atalǵan basty basylymdaryn «OtaýTV» usynǵan «telegazet» arqyly oqý múmkindigine qol jetkizgendigin maqtanyshpen málimdeı alamyn»,-deıdi Abaı Marabaıuly. Bul suhbat «Telegazet» degen taqyryppen berilgen.
Osy basylymda «Balýanǵa laıyq qurmet» degen maqala jarııalandy. Jerlesteri Muhıt Tursynovqa úsh bólmeli páter men «Kıa Rıo» avtokóligin syıǵa tartty. Mıllıondaǵan kórermendi teledıdarǵa telmirtip, barsha qazaqstandyqtardy baýraǵan, Elbasy Nursultan Nazarbaevtyń júldesine arnalǵan «Qazaqstan barysy» týrnıriniń jeńimpazy Muhıt Tursynovty shyǵysqazaqstandyqtar áýejaıdan zor qoshemetpen qarsy aldy. Óskemenniń halyqaralyq áýejaıy aldynda jıylǵan jurtta qısap joq.
***
Kúni keshe qos shatyrly Parlamenttiń 3-sessııasynyń shymyldyǵy jabylyp, depýtattar arqasyn keńge saldy. Degenmen, barlyq qalaýlylardan 6 shildege deıin, ıaǵnı «Astana kúni» merekesinde elordada qala turý suraldy. Óıtkeni osy meıram aıasynda ótetin sanalýan sharalarǵa parlamentarııler de qatystyrylady. Odan keıin depýtattar aýyl-aımaqtarǵa attanyp, on kún boıy ártúrli óńirlerde jergilikti jurtshylyqpen kezdesedi. Sodan qyrkúıekke deıin qoldary bos, jaǵasy jaılaýda: qaıda demalamyn, nemen shuǵyldanamyn dese de óz erikterinde. Osy oraıda «Aıqyn» gazeti elge tanymal qalaýlylardyń jazǵy kanıkýldaǵy josparyn «Depýtattar elde demalady» degen maqalada usynyp otyr.
«Aıqyn» basylymynyń jazýynsha, Mınıstrler kabıneti keshegi otyrysynda Áleýmettik-ekonomıkalyq saıasattyń birinshi kezektegi sharalarynyń, «Jol kartasynyń» júzege asý barysyn qarady. Bul karta elimizdi quldyraý qurdymynan saqtap qalý, el ekonomıkasynyń ósý qarqynyn arttyrý jolyn nusqaıdy. Osy oraıda qarqyny báseńdeı bastaǵan ekonomıkaǵa serpin berý úshin Ulttyq qordan 1 trıllıon teńge bólinýde. Ekonomıka mınıstri E.Dosaev Úkimet múshelerin osynsha qarjy tasqynynyń qalaı ıgerilip jatqandyǵy jaıynda qulaǵdar etti. Al jıynnan shyqqan mınıstrden jýrnalıster «Olımpıadany ótkizýden bas tartpaımyz ba?» dep surady. Osy jaıynda tolyq bilgińiz kelse, gazettiń búgingi sanyndaǵy «Ýnıversıada Olımpıadanyń «qolyna sý quıady» degen maqalany qarańyz.
***
«Ekspress-K» basylymynyń búgingi sanynda «Palma-mater» atty maqala jarııalandy. Astanalyq botanık Evgenıı Kýdrıak aıazǵa tózimdi palmanyń erekshe túrin shyǵaryp, ony elordada ósetindeı beıimdemek. Onyń sózine qaraǵanda, bul aǵash bolashaqta -35 gradýstyq temperatýraǵa úsip ketpeı, jyl boıy jasyl túrinde jaıqalyp turmaq.
