Depýtat týrızm salasynda adal básekelestik tetikterin engizýdi surady
ASTANA. KAZINFORM – Búgin Májilistiń jalpy otyrysynda depýtat Rýslan Qojasbaev týrızm salasyndaǵy máseleni kóterdi.
- Tsıfrlyq tehnologııalar men platformalyq ekonomıkanyń tez damyp jatqan kezeńinde biz úshin mańyzdy mindet tur. Ol - ınnovatsııa men áleýmettik ádilettiliktiń, tehnologııa men shaǵyn bıznestiń múddeleri arasynda tepe-teńdikti saqtaý. Búgin myńdaǵan qazaqstandyq kásipkerdi alańdatyp otyrǵan máseleni kótergim keledi. Bul — týrızm salasy. Bul jaı ǵana bıznes emes, bul — adamnyń sezimi, senimi, armany men jospary. Biraq dál osy salada biz naryqty shaıqaltyp jatqan qaýipti ózgeristerdi kórip otyrmyz. Men týrıstik agenttik qaýymdastyǵynyń ókilderimen birqatar kezdesý ótkizdim. Kásipkerler ózderiniń bıznesine qaýip tóndirip turǵan jaǵdaıdy aıtty. Bul rette banktermen úlestes iri tsıfrlyq platformalar naryqqa tez enip jatyr. Olar «paıyzsyz» qaryz degen jeleýmen tutynýshylyq nesıe retinde berilgen týrıstik paketterdi bólip-bólip tóleýdi usynady, - dedi R. Qojasbaev Úkimet basshysynyń atyna joldaǵan saýalynda.
Onyń aıtýynsha, mundaı usynystar tartymdy jáne tutynýshylar suranysyn yntalandyrady. Jalpy, tsıfrlyq týrpaketterdiń naryqtyq úlesi jyldam ósip keledi jáne «Qamqor» qorynyń málimeti boıynsha bir ǵana operatordyń naryqtaǵy úlesi qazirdiń ózinde 50%-dan asyp jyǵylady. Bul óz kezeginde kompanııanyń basym pozıtsııasy dep tanylýy múmkin jáne mundaı naryqty retteý qajet.
- Tsıfrlyq platforma klıentteriniń búkil legin sanaýly kompanııa ǵana óńdeıdi. Al Qazaqstandaǵy shaǵyn týragentter qyzmet kórsetýdiń jańa júıesinen tys qalyp otyr, ıaǵnı olar tabysynan aıyrylady… Máselen, shetelde túrli jaǵdaı bolady. Sonyń ishinde reısterdi toqtatý, vıza erejelerin ózgertý, jedel medıtsınalyq kómek kórsetý sııaqty oqıǵalarda el azamattary óz problemasymen jalǵyz qalýy múmkin. Týrdy satqan tsıfrlyq platforma klıentti qoldaýǵa qatysty jaýapkershilik kótermeıdi, - dedi depýtat.
Onyń sózine qaraǵanda, adamdardyń shetelge saparyn qamtyǵan týrızm naryǵy monopolııalyq sıpatqa ıe boldy. Tsıfrlyq platformalar qarjylyq resýrstarǵa, marketıngke jáne klıenttik bazaǵa qol jetkize alady. Al dástúrli agenttikterde jaýapkershilik, salyq jáne jumyspen qamtý bar. Bul jaǵdaıda básekelestik joǵalyp barady.
- Birqatar tsıfrlyq platformar Astana Hub-ta tirkelgen jáne salyqtan bosatylǵan. Olardyń dástúrli týrıstik kompanııalarmen salystyrǵanda, aıtarlyqtaı básekelestik artyqshylyqtary bar. Bul turǵyda másele tehnologııamen kúresý jóninde emes. Atap aıtqanda, básekelestikti, ashyqtyqty jáne naryqty qorǵaý týraly máseleni kóterip otyrmyn. Biz bızneske birdeı jaǵdaı jasaýǵa mindettimiz, - dedi Rýslan Qojasbaev.
Osy oraıda ol týrıstik qyzmetterdi nesıege satatyn jáne banktermen úlestes tsıfrlyq platformalardyń básekelestik, tutynýshylardyń quqyqtaryn qorǵaý jáne kásipkerlik týraly zańnamaǵa sáıkestigine vedomstvoaralyq taldaý júrgizýdi surady. Sonymen qatar, naryq sýbektileri úshin adal básekelestik jasaý maqsatynda týrızm naryǵyn retteý sharalaryn qabyldaý kerek ekenin aıtty.
Budan buryn habarlanǵandaı, elimizde agrarlyq týrızm qyzmetiniń erejeleri ázirlenip jatyr.