Depýtat taksıdegi jaǵdaıǵa qatysty: ulttyq qaýipsizdikke qaýip tóndiredi

ASTANA. KAZINFORM — Májilis depýtaty Marhabat Jaıymbetov iri taksı agregatorlary alatyn komıssııalardyń mólsherin retteýge qatysty usynys aıtty. 

— Sońǵy jyldary naryqta tsıfrlyq platformalar artyp jatyr. Biraq, kólik qyzmetteri naryǵynda biz avtobeketterdiń is júzinde joǵalyp ketkenin, qalaaralyq tasymaldaý kóleminiń azaıyp bara jatqanyn baıqaımyz. Taksı parkteri úlkeıedi nemese bankrotqa ushyraıdy. Júz myńdaǵan qazaqstandyq júrgizýshiler tsıfrlyq taksı agregattaryna qatty táýeldi boldy. Tólengen árbir jol aqysynyń bir úzimin otandyq júrgizýshi alsa, qalǵanyn syrttaǵylar alyp otyr. Osy kúndelikti tirshiligimizben bite qaınasyp ketken onlaın servıstik taksı qyzmetinen tapqan tabystardyń belgili bir paıyzy syrtqa ketip jatyr. Bir qaraǵanda barlyǵyn sheteldik tehnokrattar jasap berip jatyr ǵoı deı salýǵa bolady. Shyn mánisinde, biz solarǵa táýeldi bolý arqyly ishki qarjy aınalymynda ońbaı utylyp jatyrmyz, — dedi Marhabat Jaıymbetov Premer-mınıstriniń birinshi orynbasary Roman Sklıardyń atyna joldaǵan saýalynda.

Onyń aıtýynsha, qazirgi tańda tsıfrlyq taksı platformalary 16 paıyzdan bastalyp, qosymsha taksoparkter taǵy 2-4% qosyp alady.

— Shyn máninde, tabystyń kóp bóligi platformalar men taksoparkterdiń komıssııasyna ketip, júrgizýshilerdi kúrektep aqsha taýyp jatyr dep aıta almaımyz. Sheteldik platformalar óz múmkindikterin tıimdi paıdalanyp otyr, naryqtyń basym bóligi solarda. Elimizde otandyq qosymshalarǵa qoldaý az, resýrsy shekteýli bolǵandyqtan, olar básekege tótep bere almaıtynyn baıqaımyz. Báseke bolmaǵan soń halyqtyń tańdaý múmkindigi tarylyp, sapa men baǵa máselesi de sheshilmeı tur. Jeke qabyldaýlarda halyq taksı tarıfteriniń negizsiz qymbattaýyn alǵa tartady. Ásirese, mereke kúnderi nemese kún raıy kúrt ózgerse baǵa birden sharyqtap ketedi. Búgingi tańda sheteldik tsıfrlyq platformalar ekonomıkalyq aınalymnan júrgizýshiler men halyqty qosa alǵanda, el ekonomıkasyna ınvestıtsııa salmaı-aq, ınfraqurylymdy damytpaı-aq ondaǵan mıllıard teńge alyp otyr deýge bolady. Osyndaı jaǵdaılar elimizdiń ulttyq jáne ekonomıkalyq qaýipsizdigine tikeleı qaýip tóndiredi, — dedi depýtat.

Onyń sózine qaraǵanda, sheteldik tsıfrlyq platformalardyń naryqtaǵy monopolııalyq jaǵdaıy onyń kirisin baqylamaı-aq qaıta arttyrýǵa múmkindik berip otyr. Tsıfrlyq qyzmetter salasyndaǵy komıssııalyq saıasatty qaıta qarap, ulttyq múddeni qorǵaýdy kúsheıtý — ýaqyt talaby.

— Birinshiden, qazaqstandyq tsıfrlyq qosymshalardy qurýǵa qoldaý kórsetý kerek. Tabysty qazaqstandyq tsıfrlyq platformalardy jumysqa tartý mańyzdy. Ekinshiden, osy naryq úshin asa mańyzdy ınfraqurylymdy — eldiń tsıfrlyq kartasyn qurý qajet. Ol ulttyq qaýipsizdik turǵysynan da mańyzdy, — dedi Marhabat Jaıymbetov.

Sonymen qatar ol iri taksı agregatorlary alatyn komıssııalardyń mólsherin baǵalyq retteýdi talap etý kerek, ıaǵnı taksı platformalardyń komıssııasyn 3- 5% deıin túsirý qajet ekenin aıtty.

Eske salsaq, polıtsııa kóshi-qon zańnamasyn buzǵan 700-ge jýyq sheteldik taksı júrgizýshisin anyqtady.