Depýtat: Sýbsıdııa qaryzy sharýalardy aýyr nesıege uryndyryp jatyr
ASTANA. KAZINFORM — «QazAgroQarjynyń» lızıng sharty qazirgi ınflıatsııanyń aldynda qaýqarsyz. Senator Bekbolat Orynbekov depýtattyq saýalynda osyndaı másele kóterdi.
Depýtat «Agrarlyq nesıe korporatsııasy» aktsıonerlik qoǵamy arqyly nesıelerdiń paıyzdyq mólsherlemesin sýbsıdııalaý óte baıaý júrip jatqanyn aıtady.
— Sondaı-aq, memlekettiń sharýalar aldynda 341,3 mlrd teńge sýbsıdııa qaryz bar. Onyń 152,2 mlrd teńgesi paıyzdyq mólsherlemelerdi óteýge tıesili. Tólemderdiń ýaqtyly jasalmaýy fermerlerdi nesıeni 20-22% kommertsııalyq mólsherlememen óteýge májbúrleıdi. Bul is júzinde olardy qaryzǵa batyrady, — dedi ol.
Senator jeńildetilgen nesıege fermerdiń bári qol jetkize almaıtynyn da synady. qoljetimdiliktegi teńsizdik máselesine de toqtaldy.
— Ekinshi deńgeıli bankter aýyldaǵy aktıvterdi baǵalaǵanda konservatıvti saıasat ustanyp, kepil múlkin tómendetilgen koeffıtsıentpen alýy shaǵyn jáne orta qojalyqtardyń qarjy tartý múmkindigin shektep otyr. Aýyl sharýashylyǵy tehnıkasynyń tozý deńgeıiniń 75%-dan asyp ketken. Sondaı-aq «QazAgroQarjy» AQ lızıngtik baǵdarlamalarynyń qazirgi ınflıatsııalyq jaǵdaılarǵa sáıkes kelmeıdi Osy máseleler boıynsha Úkimettiń ustanymyn bilgimiz keledi. Sýbsıdııalar boıynsha bereshekti óteýdiń egjeı-tegjeıli aı saıynǵy kestesin usyný qarastyrylǵan ba? Fermerlerdiń shyǵyndaryn óteýdiń quqyqtyq tetigi bar ma? «Agrarlyq nesıe korporatsııasy» arqyly nesıe berý tetigin zańnamalyq deńgeıde bekitý múmkindigi qarastyryla ma? Aýyldaǵy jyljymaıtyn múlik pen jer paıdalaný quqyǵyn ádil baǵalaıtyn arnaıy memlekettik ınstıtýt qurý nemese kepildik qorlarynyń múmkindikterin keńeıtý josparda bar ma? Investıtsııalyq sýbsıdııalardyń keminde 50 paıyzyn aldyn ala tóleý tetigin engizý múmkin be? Úkimettiń tek óndiriske ǵana emes, aýyl sharýashylyǵy ónimderin tereń óńdeýge baǵyttalǵan jobalar úshin uzaq merzimdi nesıe berý baǵdarlamalaryn ázirleýge qatysty ustanymy qandaı? — dep surady Bekbolat Orynbekov.
Al Májilis depýtaty Nurtaı Sabılıanov jeke kásipkerlerge qaıtarymsyz sýbsıdııa berýdi toqtatý kerek degen ustanym aıtyp júr.