Depýtat SQ-Farmatsııany synǵa aldy: bul uıymdy ne úshin qurdyq

ASTANA. KAZINFORM — SQ-Farmatsııanyń  óz logıstıkalyq ınfraqurylymy joq. Bul týraly Parlament Májilisiniń jalpy otyrysynda depýtat Ashat Aımaǵambetov aıtty.

- SQ-Farmatsııaǵa toqtalsaq, biryńǵaı dıstrıbıýtordyń óz logıstıkalyq ınfraqurylymy joq. Logıstıkanyń 90 paıyzy úsh kompanııanyń qolynda. Osyndaı monopolızatsııa logıstıkalyq shyǵyndardyń 1,5 ese ósýine yqpal etti. SQ-Farmatsııanyń ústeme baǵasy, komıssııasy dep te aıtýǵa bolady - baqandaı 7%. Bul qosymsha salyq sııaqty, bir bóligin óz shyǵyndaryna paıdalansa, bir bóligi paıda retinde, bir bóligi dıvıdend retinde bıýdjetke qaıtarylady. Paradoks, - dedi A.Aımaǵambetov palata otyrysynda dári-dármekpen qamtamasyz etý júıesine júrgizilgen memlekettik aýdıt nátıjesin talqylaý kezinde.

Onyń aıtýynsha, biryńǵaı dıstrıbıýtor 491 mlrd teńgege satyp alý júrgizdi. Biraq onyń basym bóligi tikeleı zaýyttan emes, jergilikti dıstrıbıýtorlar arqyly satyp alynady.

- Sonda biz bul uıymdy ne úshin qurdyq? Nelikten ol zaýyttardan tikeleı satyp almaıdy? Suraq kóp. Bir preparattar qoımalarda shirip, esepten shyǵarylyp jatqanda, keıbir ómirlik mańyzy bar dáriler bolmaǵan. 45 myń patsıent dárisiz qalǵan. Anyqtaǵan shyǵyndar men ysyraptar 3,7 mlrd teńgeden astam. Al yqtımal shyǵyndar 21 mlrd teńgeden astam, - dedi depýtat.

Budan buryn habarlanǵandaı, QR Joǵary aýdıtorlyq palatasynyń tóraǵasy Álıhan Smaıylov Qazaqstanda azamattardy dári-dármekpen qamtamasyz etý júıesine júrgizilgen memlekettik aýdıt nátıjesin jarııalady.

Sonymen qatar Májilisiniń jalpy otyrysynda depýtat Ashat Aımaǵambetov Qazaqstanda dárini tirkeý úshin óte kúrdeli bıýrokratııalyq rásimderden ótý kerek ekenin aıtyp, osy salany synǵa aldy.