Depýtat synynan keıin DSM eldegi narkologııalyq ortalyqtardy qatań tekseriske aldy
ASTANA.KAZINFORM — Densaýlyq saqtaý mınıstri Aqmaral Álnazarova júrgizýshilerdi medıtsınalyq kýálandyrý kezinde jekelegen narkologııalyq ortalyqtardyń tarapynan jiberiletin zańbuzýshylyqtar máselesi boıynsha keńes ótkizdi. Bul týraly vedomstvonyń baspasóz qyzmeti málim etti.
Keńes barysynda azamattardyń ótinishteri, depýtattyq saýaldar jáne alkogoldik masań kúıdi anyqtaý boıynsha kýálandyrý júrgizý kezinde belgilengen rásimderdiń saqtalmaýyna qatysty anyqtalǵan faktiler qaraldy.
— Mınıstr Medıtsınalyq jáne farmatsevtıkalyq baqylaý komıtetine qoldanystaǵy standarttar men medıtsınalyq kýálandyrý júrgizý tártibiniń saqtalýyn tekserý maqsatynda barlyq óńirlik narkologııalyq ortalyqtarǵa keshendi tekserý júrgizýdi tapsyrdy, — delingen habarlamada.
Vedomstvo basshysy zańbuzýshylyqtar anyqtalǵan jaǵdaıda materıaldar qoldanystaǵy zańnamanyń sheńberinde protsestik sheshimder qabyldaý úshin quqyq qorǵaý organdaryna jiberiletinin atap ótti.
Sondaı-aq, Densaýlyq saqtaý mınıstrligi medıtsınalyq kýálandyrý júrgizý tártibin retteıtin QR DSM-niń tıisti buıryǵyna rásimderdiń ashyqtyǵyn arttyrý, azamattardyń quqyqtaryn qorǵaý jáne daýly jaǵdaılardyń aldyn alý maqsatynda ózgerister men tolyqtyrýlar ázirleıdi.
Densaýlyq saqtaý mınıstrligi atalǵan máseleni erekshe baqylaýda ustap otyr.
Aıta keteıik, Astanada 1000-ǵa jýyq adam narkologııalyq esepte tur.
