Depýtat mashına jasaý salasyndaǵy kórsetkishterdi synǵa aldy
ASTANA. KAZINFORM – Memlekettik qoldaýǵa qaramastan, mashına jasaý salasynda tıisti kórsetkishter oryndalmaǵan. Bul týraly Májilis depýtaty Nurtaı Sabılıanov aıtty.
«Mashına jasaý salasyna da qomaqty qarajat bólinip jatyr. Sońǵy úsh jylda bul baǵytqa ártúrli qarajat kózderinen respýblıkalyq bıýdjettiń 285 mlrd teńgesi bólindi. 2023 jyldyń qorytyndysy boıynsha shaǵyn toraptyq tásilmen tek 13 myń avtomobıl shyǵaryldy, bul 2023 jylǵy shyǵarylǵan jalpy kóleminiń 9,7% ǵana. Qalǵandary baıaǵy «otvertochnaıa sborka» negizinde qurastyrý boldy, ıaǵnı bul úrdis bizdiń avtoónerkásiptiń ádetine aınalyp barady. Negizgi lokalızatsııaǵa kóńil bólinbeıdi. Mundaı memlekettik qoldaý kezinde tıimdilik áldeqaıda joǵary bolýy kerek dep sanaımyz», - dedi N. Sabılıanov Parlament Májilisindegi Úkimet saǵatynda.
Onyń aıtýynsha, ónerkásipti damytý qorynan qarajat alǵan kóptegen kompanııa tek kólik pen tehnıkany satyp alǵan. Bul ónerkásip salasynyń damýymen tikeleı baılanysty emes.
«Onyń ústine, Ulttyq banktiń salalyq sholý derekterine sáıkes, 2023 jyldyń 4-toqsanynda óńdeý ónerkásibindegi óndiristik qýattardyń ortasha ólshemdi júktemesi nebári 51,1 % boldy. Osyǵan baılanysty, jańa jobalar men bastamalarǵa jyl saıyn qarajat bólýdiń oryndylyǵy týraly másele týyndap otyr. Aldymen bar jobalardy iske qosyp, naqty nátıjelerin, tıimdiligin kóreıik. Sodan keıin ǵana jańa jobalardy qarjylandyrýdy jalǵastyrý kerek dep sanaımyn. Sondaı-aq, ónerkásiptik saıasat máseleleri jónindegi vedomstvoaralyq komıssııa jumysynyń asa tıimdi bolmaı otyrǵanyna nazar aýdarǵym keledi. Onyń zańǵa sáıkes ónerkásipti memlekettik yntalandyrý sharalaryn retteýge jáne jobalardy iske asyrý jónindegi esepterdi tyńdaýǵa quqyǵy bar. Alaıda, komıssııa bul ókilettikterdi tolyq paıdalanbaıdy», - dedi depýtat.
Budan buryn habarlanǵandaı, Ónerkásip jáne qurylys mınıstri Qanat Sharlapaev elimizde jańadan qaı avtokólik túrleri shyǵarylatynyn jarııalady.
Avtokólik óndirýshileriniń aldynda shaǵyn torapty qurastyrý úlesin 2027 jylǵa qaraı jalpy óndiris kóleminen 50 paıyzǵa deıin ulǵaıtý boıynsha mindettemeler tur.
