Depýtat Qazaqstanda Roblox platformasyn tekserýdi surady
ASTANA. KAZINFORM — Búgin Májilistiń jalpy otyrysynda depýtat Únzıla Shapaq Roblox onlaın-platformasyn shekteýge qatysty usynys aıtty.
— Qazirgi tańda ınternet pen onlaın oıyn platformalary balalar men jasóspirimderdiń kúndelikti ómiriniń ajyramas bóligine aınaldy. Solardyń biri — Roblox onlaın-platformasy. Qazir «Roblox» sózin bilmeıtin bala joq. Bul paıdalanýshylarǵa óz oıyndaryn qurýǵa, vırtýaldy álemderde qarym-qatynas jasaýǵa jáne basqa oıynshylarmen tikeleı baılanys ornatýǵa múmkindik beretin halyqaralyq platforma. 2025 jylǵy ashyq derekkózderge sáıkes, Roblox platformasyna kiretin kúndelikti belsendi qoldanýshylar sany 150 mıllıonǵa jýyq. Paıdalanýshylardyń basym bóligin kámeletke tolmaǵan balalar men jasóspirimder. Ata-analar, pedagogter jáne halyqaralyq sarapshylar tarapynan Roblox oıynynyń balalar psıhıkasyna keri áser etýi múmkin ekendigi týraly jıi kóterilip jatyr. Atap aıtqanda, vırtýaldy táýeldilik, agressıvti minez-qulyq, shynaıy ómirden alshaqtaý, sondaı-aq jas ereksheligine saı kelmeıtin kontentpen betpe-bet kelý faktileri kezdesedi, — dedi Ú. Shapaq Jasandy ıntellekt mınıstrligine joldaǵan saýalynda.
Onyń aıtýynsha, Roblox sııaqty ashyq onlaın-platformalarda kámeletke tolmaǵan balalarǵa qatysty qylmystyq nıeti bar adamdardyń, sonyń ishinde pedofılder men alaıaqtardyń belsendi áreket etetini týraly derekter bar. Aldymen oıyndaǵy vırtýaldy chat arqyly balanyń senimine kirip, keıinnen Roblox-tan Telegramǵa kóship, qupııa kezdesýge shaqyrady jáne aıaǵy qaıǵyly oqıǵamen aıaqtalýy múmkin.
— Al alaıaqtar dál osylaı balanyń senimine kirip, oǵan syılyq berýge ýáde berip, ata-anasynyń kartasynyń nomerin jáne SMS-kodty suraıdy. Bala senip aıtqandaryn oryndaıdy, nátıjesinde kartadan aqsha sheshilip alynady. Árıne, kompanııa «balalarǵa eń qaýipsiz orta jasaımyz» dep jar salýdan jalyǵar emes. Biraq sekýndyna 50 myńnan astam habar aǵylyp jatqan ortany tolyq baqylaý múmkin emes. Roblox platformasynyń balalar qaýipsizdigine, psıhologııalyq damýyna jáne kontenttiń baqylaýsyzdyǵyna baılanysty birqatar memleketter qatań sharalar qabyldaýda. Atap aıtqanda, Túrkııa, Katar, Reseı, Qytaı, Iran, Soltústik Koreıa jáne basqa da memleketterde atalǵan platforma buǵattaldy… Ózge elderde Roblox platformasyn buǵattaý tájirıbesin eskere otyryp, Qazaqstanda bul platformanyń qyzmetin shekteý nemese qosymsha baqylaý tetikterin engizý máselesi qarastyrylyp jatyr ma? , — dep surady depýtat.
Eske salsaq, byltyr jeltoqsan aıynda Mádenıet jáne aqparat vıtse-mınıstri Evgenıı Kochetov Qazaqstanda Roblox onlaın oıyndar platformasyn buǵattaý josparda joq ekenin aıtty.