Depýtat qarjy ınstıtýttaryna sýbsıdııalanatyn qarajatty tikeleı aýdarýdy surady

ASTANA. QazAqparat – Búgin Májilistiń jalpy otyrysynda Qazybek Álishev fermerlerge sýbsıdııa bólý máselesindegi kemshilikterdi atady, dep habarlaıdy QazAqparat tilshisi.

«Agroónerkásiptik keshen salasyna memlekettik qoldaý sharalary áserinen elimizdiń mal sharýashylyǵy men ósimdik sharýashylyǵynda oń damý serpini baıqaldy. Aýyl sharýashylyǵy taýaryn óndirýshiler jıi kóteretin máseleniń biri nesıe men lızıngterdiń paıyzdyq mólsherlemesiniń joǵary bolýyna qatysty. Aıta ketý kerek, búginde nesıeler boıynsha syıaqy mólsherlemesi 17% - dan 24% - ǵa deıin ósti, onyń 6% - yn sharýashylyqtar tóleıdi. Qazirgi kezde aýyl sharýashylyǵy qurylymdary nesıe men lızıng boıynsha syıaqynyń paıyzdyq mólsherlemelerin sýbsıdııalaý kezinde belgili bir qıyndyqtarǵa tap bolyp otyr. Sebebi bıýdjet qarajatynyń tapshylyǵynan sýbsıdııalardy ýaqytyly tóleý múmkindigi bola bermeıdi. Osynyń saldarynan sharýashylyqtar nesıe boıynsha syıaqyny óz aınalym qarajatynan tolyq kólemde tóleýge májbúr», - dedi Q. Álishev Qarjy jáne Aýyl sharýashylyǵy mınıstrleriniń atyna joldaǵan saýalynda.

Osy oraıda depýtat sharýalardyń usynystaryn jetkizdi.

«Nesıe men lızıngter boıynsha syıaqy mólsherlemelerin sýbsıdııalaý úshin qarjy ınstıtýttaryna sýbsıdııalanatyn qarajatty tikeleı aýdarý múmkindigin qarastyrýdy suraımyz. Bul máseleni sheshý aýyl sharýashylyǵynyń jalpy óniminiń ósýine oń áser etedi jáne fermerlerdiń qarjylyq jaǵdaıyn jaqsartady», - dedi Qazybek Álishev.

Budan buryn habarlanǵandaı, jaqynda Memleket basshysy Qasym-Jomart Toqaev elimizde sýbsıdııa berý júıesi óte kúrdeli ekenin aıtty.