Depýtat: Ekologııalyq kodekstiń talaptary der kezinde oryndalýy kerek
ASTANA. KAZINFORM – Mańǵystaý oblysynda Májilistiń Ekologııa máseleleri jáne tabıǵatty paıdalaný komıtetiniń tóraǵasy Edil Jańbyrshınniń jetekshiligimen kóshpeli otyrys ótti. Bul týraly Májilistiń baspasóz qyzmeti habarlady.
Jıyn Mańǵystaý oblysynyń ekologııalyq, energetıkalyq problemalary men sýmen jabdyqtaý máseleleri jáne olardy sheshý joldaryna arnaldy.
Oǵan Májilis depýtattary, Mańǵystaý oblysynyń ákimi men orynbasarlary, ortalyq atqarýshy organdardyń basshylary, qala jáne aýdan ákimderi, barlyq deńgeıdegi jergilikti máslıhat tóraǵalary men óńirdegi iri óndiris mekemeleriniń basshylary qatysty.
Otyrysta oblys ákiminiń birinshi orynbasary Erbol Іzbergenov óńirdegi qorshaǵan ortany qorǵaý baǵytynda atqarylyp jatqan jumystar jóninde baıandady.
— Mańǵystaý óńirindegi «Qoshqar-Ata» qaldyqtar qoımasyn rekýltıvatsııalaý jumystary 2007 jyly bastaldy. Jobaǵa sáıkes 4279 ga jerdi 30 sm qalyńdyqta topyraqty tyǵyzdaý arqyly kómý jumystaryn júrgizý qarastyrylǵan. Búgingi kúni jalpy aýdany 584,2 ga radıatsııalyq qaýipti jer qalpyna keltirildi, — dedi Erbol Іzbergenov.
Óz kezeginde Energetıka vıtse-mınıstri Suńǵat Esimhanov Mańǵystaý óńirindegi energetıka máselesine toqtaldy. Onyń aıtýynsha, qazir «Mańǵystaý atom energetıkalyq kombınaty» — JEO — 1 (tozý — 76%), JEO — 2 (tozý — 82%) jáne JES (tozý — 87%) turatyn biryńǵaı energııa, jylý óndirýshi keshen. Onyń negizgi mindeti — elektr, jylý energııasymen jáne ystyq sýmen qamtamasyz etý.
Otyrysta Ekologııa jáne tabıǵı resýrstar vıtse-mınıstri Jomart Álıev Mańǵystaý oblysyndaǵy ekologııalyq jaǵdaı týraly málimet berip, Tótenshe jaǵdaılar vıtse-mınıstri Serik Tólenbergenov tótenshe jaǵdaılardyń aldyn alý jáne joıý máselelerine toqtaldy.
Sý resýrstar jáne ırrıgatsııa vıtse-mınıstri Erbolat Ibraıhanov klımattyq ózgerister men sýǵa degen suranystyń artýy jaǵdaıynda sý resýrstaryn tıimdi basqarýdyń mańyzdylyǵyn, sondaı-aq 2025 jyly Aqtaý qalasynda Kaspıı zertteý ınstıtýty ashylatynyn aıtty.
Otyrys aıasynda komıtet depýtattary Mańǵystaý oblysynda qordalanǵan máselelerge qatysty ortalyq jáne jergilikti organdardyń basshylaryna suraqtaryn qoıdy. Oblys ákimi Nurdáýlet Qılybaı óz sózinde óńirdegi ekologııalyq jáne energetıkalyq máselelerdi sheshý baǵytynda jasalyp jatqan jumystarǵa toqtaldy.
Komıtettiń kóshpeli otyrysyn qoryta kele, Edil Jańbyrshın óńirdegi energetıka, ekologııa jáne aýyz sý máselelerin sheshý úshin birneshe baǵytta jumysty kúsheıtý qajet ekenin atap ótti.
— Aldymen Qazaqstan Respýblıkasynyń zańdarynyń, onyń ishinde «Jylý energetıka», «Ekologııalyq Kodeks» jáne basqa da taqyrypqa qatysty zańnamalardyń talaptary der kezinde oryndalýy kerek. Mysaly, jańa kóterilgen las shyǵyndylardy avtomatty túrde monıtorıng jasaý keıbir iri kásiporyndarda áli kúnge sheıin iske aspaǵan. Zań boıynsha olar 2023 jyldyń 1 qańtarynda iske qosylýy kerek edi. Sonymen qatar, «Jylý energetıka zańynda» jergilikti bıliktiń jylýmen qamtýda quzyreti men mindetteri bekitilgen. Olardy júıeli túrde qolǵa alý qajet. Aýyz sý boıynsha josparlanǵan jobalardy ýaqytyly qarjylandyrý da óte mańyzdy, — dedi Edil Jańbyrshın.
Depýtat atap ótkendeı, basshylyqqa alynatyn taǵy bir mańyzdy qujat — Prezıdent Qasym-Jomart Kemeluly Toqaevtyń 2022 jylǵy 7 qarashada Mańǵystaýǵa jumys sapary kezinde berilgen 34 tapsyrmany naqty oryndaý. Olardyń 14-i, ıaǵnı 41 paıyzy búgin talqylap otyrǵan taqyrypqa tikeleı qatysty.
— Úshinshi baǵyt — Mańǵystaý oblysynyń ekologııalyq máselelerin keshendi túrde sheshý boıynsha 2020 jyly bekitilgen Jol kartasyndaǵy 36 pozıtsııany oryndaý. Tipti, qajet bolsa, oǵan qosymsha ózgertýler engizý jaıyn qarastyrý. Osy jerde kóterilgen máseleler men usynystardy Komıtettiń kóshpeli otyrysynyń hattamasyna engizemiz. Ol Úkimetke joldanatyn bolady, — dedi Edil Jańbyrshın.
Komıtettiń kóshpeli otyrysy aıasynda Májilis depýtattary Mańǵystaý oblysyndaǵy «Qoshqar-Ata» qaldyq qoımasy, «Mańǵystaý atom energetıkalyq kombınaty», «QazAzot», «Kaspıı» sý tushytý zaýyty, «Caspi Bitum», «Jetibaımunaıgaz» kásiporyndaryn, sondaı-aq basqa da óndiristik nysandar men «Mańǵystaý eksperımentaldy botanıkalyq baǵy», «Qyzylsaı», «Qarakól» sııaqty erekshe qorǵalatyn tabıǵı aýmaqtardyń qyzmetimen tanysty.
