Depýtat balalardyń jazǵy demalys oryndaryn synǵa aldy
ASTANA. KAZINFORM – Májilis depýtaty Elnur Beısenbaev elimizdegi balalardyń jazǵy demalysyn sapaly uıymdastyrýǵa qatysty usynys aıtty.
«Balalardyń jazǵy demalysyn uıymdastyrýda olqylyqtar bar. Máselen, byltyr Almaty oblysynyń Uzynaǵash aýylynda balalar lagerin saýnada uıymdastyrǵan. Ol qoǵamda úlken shý týǵyzdy. Osy másele boıynsha sot jýyrda ǵana aıaqtaldy. Kináliler sottalyp, bas bostandyqtarynan aıryldy. Sot 2023 jyly kásipker áıeldiń 50 balany balalar lageri dep óz jeke mektebine, 300 balany fıtnes-ortalyǵy bar monsha keshenine ornalastyrǵanyn anyqtady. Basqa basqa, balaǵa qatysty mundaı teris qadamǵa barý – naǵyz bassyzdyq, aqsha úshin ardan attaý emes pe?! Taǵy bir mysal. Bas prokýratýra 2023 jyly tamyzda Almaty oblysynda ýákiletti organnyń ruqsatynsyz jumys istegen 8 balalar lagerin anyqtaǵan. Olardaǵy jaǵdaı da eshbir syn kótermeıdi. Sanıtarııalyq-epıdemıologııalyq jáne órt qaýipsizdigi normalary múldem saqtalmaǵan. Sport jáne oıyn alańdary da qaýipsizdik talaptaryna saı emes. Byltyr Qonaev qalasyndaǵy «Báıterek» lagerinde shartta kórsetilgenine qaramastan, balalardyń tıisti demalysy men oqýy uıymdastyrylmaǵan», - dedi E. Beısenbaev Úkimet basshysynyń orynbasary Tamara Dúısenovanyń atyna joldaǵan saýalynda.
Onyń aıtýynsha, sol sekildi Shymkenttegi «Hawaii» lageri órtke qarsy dabyl júıesimen jabdyqtalmaǵan jáne mindettelgen sanıtarlyq-epıdemıologııalyq qorytyndysyz jumys istegen. Sondaı-aq, 220 balaǵa arnalǵan «Úsh bulaq» lageri is júzinde 310 oqýshy qabyldaǵan.
«Aıta bersek, mundaı mysaldar jeterlik. Balalar mundaı jazǵy demalys oryndarynda alańsyz tynyǵyp, jańa oqý jylyna tyń kúshpen kelýdiń ornyna, túrli keleńsizdikke ushyrap jatqany ókinishti. Tıisti zań endi mundaı oryndardy eskertýsiz tekserip, talapty saqtamaǵandarǵa naqty shara qoldanýǵa múmkindik beredi. Sondyqtan osyndaı olqylyqtardyń barlyǵyn joıyp, balalardyń bıylǵy jazǵy demalysyn sapaly uıymdastyrýǵa jete mán bergen jón. Bul rette, elimizde balalar lageri múldem jetispeıdi. Olar bar bolǵany balalardyń 10 paıyzyn ǵana qamtıdy. Onyń ishinde sapaly demalysty qamtamasyz ete alatyny sanaýly ǵana. Pandemııadan keıin lagerlerdiń 30 paıyzy naryqtan ketti. Ashyǵyn aıtý kerek, balalardyń jazǵy demalyspen qamtylýy týraly statıstıka kókóıge qonbaıdy. Óıtkeni, jergilikti ákimdikter mektep janyndaǵy lagerlerdi jazǵy lager dep esepteıdi. Atap aıtqanda, mektep janyndaǵy lagerler – jazǵy demalys emes. Ol tek qana 5-6 saǵat ýaqyt ótkizýge arnalǵan», - dedi depýtat.
Bul turǵyda ol tez arada tıisti jumystardy atqarýdy usyndy.
«Birinshiden, sý tasqynynan zardap shekken óńirlerdiń balalaryna jazǵy saýyqtyrý ortalyqtarynan oryn bólýdi qarastyrǵany jón. Ekinshiden, memlekettik satyp alý boıynsha konkýrs ótkizý kezinde erekshelikteri bar balalarǵa ınklıýzıvtik bilim berý talaptaryn oryndaý kózdelýi tıis», - dedi Elnur Beısenbaev.
