Depýtat aýyl halqynyń tabysyn kóterýdegi kemshilikterdi atady
ASTANA. KAZINFORM – Májilis depýtaty Maqsat Tolyqbaı «Aýyl amanaty» baǵdarlamasyn júzege asyrý kezinde anyqtalǵan kemshilikterdi jarııa etti.
- Bizdiń partııa qolǵa alǵan salalyq baǵdarlamanyń biri «Aýyl amanaty» dep atalady. Úsh jyl buryn iske qostyq, jetistikter barshylyq. Tek 2023 jyly 100 mlrd teńge shaǵyn nesıe berildi. 15 000 jańa jumys orny ashyldy. Biraq baǵdarlamanyń oryndalýyna kelgende, aıtylyp jatqan syn az emes. Ázirge, aýyl halqynyń tabysyn toltyrýǵa arnalǵan eldegi jalǵyz joba – osy bolǵandyqtan, odan úmit kútetin el kóp. Biraq, sol eldiń bul jobaǵa aıtar ókpe-nazy da joq emes. Nege bulaı? Kásipten násibin tapqysy keletinderdi ákimdik áýre-sarsańǵa salǵan. Bıýrokratııa saldarynan úsh-tórt aılap qujat jınatyp, tabanynan tozdyrady. Ekinshiden bul jobany qarjylandyrý tetigi de qaryn ashytady. Negizi jobanyń basty maqsaty - 7 jylda 350 myń jumys ornyn ashyp, jyl saıyn keminde 20-25 myń turǵynǵa mıkronesıe berilý kerek. Biraq bıýdjet tapshylyǵyna baılanysty, byltyr jobaǵa bar bolǵany 20 mlrd teńge bólingen, - dedi Maqsat Tolyqbaı Májilistiń jalpy otyrysynda premer-mınıstrdiń orynbasary–Ulttyq ekonomıka mınıstri Serik Jumanǵarınniń atyna joldaǵan saýalynda.
Onyń aıtýynsha, kooperatıvterde veterınar, zootehnık, mehanızator, agronom sııaqty mamandar jetispeıdi. Sondyqtan eń aldymen aýyl turǵyndary arasynda jalpy joba týraly, sonyń ishinde aýyl kooperatıvteriniń jurtqa, naryqqa beretin paıdasy men múmkindikteri týraly túsindirý jumystaryn shıratqan jón.
- Jalpy kredıttiń bárin tek mal satyp alýǵa ǵana berýge bolmaıdy. Mal jatqanǵa emes, baqqanǵa bitedi. Al ony baǵyp qaǵý úshin jaıylymdardyń jaıyn aıtpaǵanda, elde áli kúnge deıin kópke úlgi bolatyn jem-shóp daıyndaıtyn ortalyqtar júıesi joq. Bul da ózekti. Sonymen qatar qazir shalǵaıdaǵy aýylǵa lızıngke traktorlar berile bastady. Jaqsy bastama. Biraq tehnıka erteń synbaı ma? Oǵan ary qaraı qosalqy bólshekterin qaıdan alady el? Jappaı traktorlarǵa qyzmetti kim kórsetedi? Tehnıkanyń saqtalýyn kim qamtamasyz etedi? Qysqasy aıta berseń basy ashyq suraqtar óte kóp. Sondyqtan sizden, osy máselelerge shuǵyl arada nazar aýdarýyńyzdy suraımyn, - dedi depýtat.
Byltyr «Aýyl amanaty» baǵdarlamasyna qatysýǵa ótinim berý jeńildeıtini habarlanǵan edi.