Depýtat áskerı kafedralardaǵy kemshilikti atady

ASTANA. KAZINFORM – Qazaqstandaǵy áskerı bilim berý júıesine aýqymdy reformalar qajet. Senator Darhan Qydyráli óziniń búgingi depýtattyq saýalynda osy máseleni kóterdi.

Depýtattyń sózine qaraǵanda, oqý oryndaryn álemdik standarttarǵa sáıkestendirý týraly Prezıdenttiń tapsyrmasyna qaramastan, materıaldyq-tehnıkalyq baza áli de eskirgen qalpynda qalyp otyr, al praktıkalyq daıyndyq deńgeıi tómen.

Qorǵanys mınıstrliginiń málimetinshe, joǵary oqý oryndarynda 41 áskerı kafedra jumys isteıdi. Osy kafedralardy qazirge deıin 120 myń túlek bitirip shyqqan.

- Jyl saıyn 7 myń túlek támamdaıtynyn eskersek, aldaǵy 10 jylda olardyń sany taǵy 70 myńǵa artady. Áskerge adam jetispeıdi deımiz. Sonda, zapastaǵy ofıtserler men serjanttardyń sany qatardaǵy sarbazdan da kóp bolyp ketpeı me?! Kafedra meńgerýshilerin Qorǵanys mınıstrligimen kelisedi, alaıda ádistemelik nusqaýlyqtar men oqýlyqtarda birizdilik joq. Praktıkamen ushtastyrý jaǵy da kemshin. Oqıtyn stýdentterdiń jartysyna jýyǵy aqyly negizde bilim alatyn eskersek, jekemenshik ýnıversıtetter úshin kafedralar talapker tartýdyń kózine aınalyp ketken joq pa? - dedi Darhan Qydyráli.

Sonymen qatar biryńǵaı ádistemelik baza joq, zamanaýı oqýlyqtar jetispeıdi, al oqý baǵdarlamalarynda áli kúnge deıin kónergen kezeńdegi taktıka paıdalanylady.

- Búginde álemdik qorǵanys júıesinde aýqymdy ózgerister bolyp jatyr. Sondyqtan áskerı JOO men qorǵanys salasyna ushqyshsyz basqarylatyn ushý apparattary men zamanaýı tehnologııany jetik meńgergen ulttyq rýhtaǵy kásibı mamandardy kóptep tartý mańyzdy dep oılaımyz, – dedi senator.

Byltyr depýtat Andreı Lýkın áskerı kafedralar týraly pikir aıtyp, áskerılerdi daıyndaýda jańa tásil qajet ekenin atap ótti.