Depressııany emdemese, shızofrenııaǵa ulasýy múmkin — DSM
ASTANA. KAZINFORM — Elimizde depressııaǵa shaldyqqan qyzmetkerler ýaqytsha eńbekke jaramsyzdyq paraǵyn ala alady. Ol úshin psıhıatr maman aýrýdy rastaýy kerek.
— Eger jumys isteıtin patsıenttiń densaýlyǵynda kinárat anyqtalyp, onyń jumysqa qabilettiligi tómendegen bolsa, arnaıy buıryqpen bekitilgen aýrýlar tizimindegi naýqastarǵa mindetti túrde eńbekke ýaqytsha jaramsyzdyq paraǵy beriledi. Bul tizimde depressııa dıagnozy da bar. Sebebi, bul psıhıkalyq aýrýlar qataryna jatady. Bul jańa engizilgen ereje emes. Bul talaptardyń bári burynnan bar, — deıdi QR DSM resmı ókili Ásel Qydyrálıeva Jibek Joly arnasynyń «Búgin LIVE» baǵdarlamasyna bergen suhbatynda.
Eńbekke ýaqytsha jaramsyzdyq paraǵyn alý úshin ózińiz tirkelgen emhanaǵa barý qajet.
— Klınıkalyq standarttar men hattamalarǵa sáıkes psıhıkalyq dıagnozdar mindetti túrde óziniń beıindi mamanymen rastalýy kerek. Biraq patsıentterdiń bári tikeleı psıhıatrǵa barmaıdy. Ol eń aldymen ózi tirkelgen emhanadaǵy ýchaskelik dárigerine nemese terapevtine tekseriledi. Eger olar patsıenttiń aıtyp otyrǵan shaǵymdaryna qarap, onda depressııa belgilerin anyqtasa, ár emhanada bekitilgen psıhıatr dárigerine joldaıdy. Bul joldamany emhananyń psıholog mamany da bere alady. Ary qaraı psıhıatr bul dıagnozdy naqtylaıdy. Eńbekke jaramsyzdyq paraǵyn psıhıatr ǵana bere alady, — deıdi stýdııa qonaǵy.
Al depressııaǵa shaldyqqan naýqastar aýrýdyń deńgeıine qaraı 2 aıǵa nemese dárigerdiń nusqaýymen odan da kóp ýaqytqa jumystan bosatylady.
— Árbir eńbekke jaramsyzdyq paraǵynyń belgilengen merzimi bolady. Jalpylama aýrýlarǵa barlyq emhana patsıenttiń jaǵdaıyna qaraı 20 kúnge deıin esh kedergisiz eńbekke jaramsyzdyq paraǵyn asha alady. Eger 20 kúnde naýqastyń jaǵdaıy jaqsarmasa, dárigerler keńesi 2 aıǵa deıin sozady. 2 aıdan asa eńbekke jaramsyzdyq paraǵyn ashýǵa bolatyn aýrýlar tizimi de bar. Eger sol tizbekte bolsa, dáriger naýqastyń eńbekke jaramsyzdyq paraǵyn uzarta alady. Bul aýrýlardyń tiziminde depressııa bar, — deıdi maman.
Ásel Qydyrálıeva depressııany der kezinde emdemese, saldary aýyr bolýy múmkin ekenin eskertti.
— Depressııanyń da jeńil, ortasha, aýyr túrleri bar. Depressııanyń aýyr túri shızofrenııaǵa ulasýy múmkin. Tipti manıakaldy túri de bolýy yqtımal. Ol qorshaǵan ortaǵa qaýipti. Nemese sýıtsıdaldy túri óz-ózine zııan keltirýge ıtermeleıdi. Sol úshin orta jáne aýyr satylarda mindetti túrde aýrýhanada emdelý kerek. Alǵashqy 9 aıdyń qorytyndysy boıynsha elimizde depressııamen dıspanserlik esepte 1517 adam tur, — deıdi ol.
Aıta keteıik, depressııaǵa qarsy dári em bastalǵannan keıin birneshe apta ishinde salmaqqa, júrek soǵý jyldamdyǵyna jáne qan qysymyna áser etedi.