Depozıt boıynsha eń joǵary paıyzdyq mólsherleme qandaı
«Tolyqtyrylmaıtyn jınaq salymdary boıynsha eń joǵary mólsherlemeler jylyna 14,1%, 2 jylǵa – 14,5% quraıdy. Bul qazaqstandyqtar arasynda eń talap etiletin jınaq salymdary: olarǵa qaldyqtaǵy kólemniń 83% keledi. Jyl basynan bastap teńgedegi salymdardyń barlyq túrleri boıynsha búkil ósim 429 mlrd teńgeni qurady, onyń ishinde 237 mlrd jınaq salymdaryna keldi. Basqasha aıtqanda, árbir ekinshi teńge jınaq salymdaryna ornalastyryldy, nátıjesinde olardyń kólemi 10 ese ulǵaıdy», - dep habarlaıdy Qazaqstannyń depozıtterge kepildik berý qory.
3 jáne 6 aıǵa merzimsiz jáne merzimdi depozıtter boıynsha eń joǵary syıaqy mólsherlemeleri burynǵy deńgeıde saqtaldy, sebebi olardy esepteý úshin Qazaqstan Ulttyq banki sheshim qabyldaıtyn bazalyq mólsherlemesi negiz bolyp tabylady. Aǵymdaǵy sátte ol 9,25% -ǵa teń.
Eń joǵary syıaqy mólsherlemeleriniń ósýin 12 aı merzimindegi merzimdi salymdar anyq kórsetedi: bankter 11,1% mólsherlemesimen tolyqtyrylatyn, al 11,6 % mólsherlemesimen tolyqtyrylmaıtyn merzimdi depozıtterdi qabyldaı alady. 24 aıǵa merzimdi salymdar boıynsha eń joǵary mólsherlemeler 0,1 paıyz kóleminde shamaly tómendedi.
2018 jyldyń qazan aıynan bastap Qazaqstanda depozıtterdiń jańa jiktemesi - jınaq, merzimdi jáne merzimdi emes depozıtter jumys isteı bastady.
Merzimsiz salym – bul eń daǵdyly depozıt: bank salymy shartynyń áreket etý merzimi salymshynyń syıaqylardy joǵaltpastan aqshany kez kelgen ýaqytta paıdalanýyn shektemeıdi.
2019 jylǵy qyrkúıekten bastap merzimsiz salymdar boıynsha usynylatyn eń joǵary syıaqy mólsherlemesi Qazaqstan Ulttyq bankiniń bazalyq mólsherlemesi negizinde esepteledi.
Bir jyldan asa merzimdi jáne jınaq salymdary boıynsha usynylatyn eń joǵary syıaqy mólsherlemeleri básekelestik naryqta qalyptasqan syıaqy mólsherlemeleri negizinde esepteledi, sondyqtan osy salymdar boıynsha tabystylyq – joǵary.
QDKBQ kepildigi teńgedegi merzimsiz jáne merzimdi salymdar boıynsha 10 mıllıon teńge, jınaq salymdary boıynsha – 15 mıllıon teńge quraıdy. Eger salymdar ár túrli bankterde ornalastyrylsa, QDKBQ árbir bankte ornalastyrylǵan depozıtterge jeke-jeke kepildik beredi.