Densaýlyq saqtaý mınıstri Toqaevtyń menıngıtke qatysty synyna jaýap berdi
Eske sala ketsek, Senat Tóraǵasy Densaýlyq saqtaý mınıstrligin «Menıngıtpen kúreste sylbyrlyq tanytty» dep aıyptaǵan bolatyn.
«Menıngıtpen kúreste, halyqqa aqparattyq-túsindirý jumystaryn júrgizýde qandaı da bir kemshilikterdiń bolǵanyn moıyndaımyz. Sebebi, qoǵammen ózara baılanys formaty aıtarlyqtaı ózgerdi. Biz áleýmettik jelide jumys isteýdi úırenip jatyrmyz, bul turǵyda barlyq resýrsty qoldanbadyq. Bul synmen kelisemiz», - dedi Birtanov Úkimette jýrnalısterge bergen suhbatynda.
«Al epıdemııaǵa qarsy sharalarǵa kelsek, olar Densaýlyq saqtaý mınıstrliginiń standarttary men hattamalaryna, halyqaralyq standarttarǵa sáıkes júrgizilip keledi jáne júrgiziledi. Medıtsınalyq kómekti uıymdastyrýda, ıá, syn-eskertpeler bar, onymen kelisemiz. Bul turǵyda jumys isteımiz jáne kemshilikterdi joıamyz», - dep óz sózin tolyqtyrdy ol.
Sonymen birge, mınıstr búgin Almaty oblysy men Almaty qalasyna issaparmen baratynyn eske saldy.
«Eń aldymen, respýblıkalyq shtab josparlaǵan jáne belgilegen sharalardy atqarýdyń tıimdiligin baǵalap kórgimiz keledi. Bul Densaýlyq saqtaý mınıstrligi Qoǵamdyq densaýlyqty saqtaý komıteti júrgizetin aldyn alý jáne epıdemııaǵa qarsy sharalar. Olardyń qanshalyqty tıimdi júrgizilip jatqany tekseriledi. Aýrýdan kóz jumǵan naýqastardyń týystary men jaqyndaryna kóńil aıtamyz jáne múmkindiginshe olarmen kezdesýge tyrysamyz», - dedi Eljan Birtanov.
