Densaýlyq mınıstrligi tegin medıtsınalyq kómektiń jańa modelin engizedi

ASTANA. QazAqparat - Elimizde tegin medıtsınalyq kómek kóleminiń jańa modeli engiziledi. Bul týraly búgin Úkimettiń selektorlyq rejimdegi otyrysynda Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýyna sáıkes mınıstrlik aǵymdaǵy jyldyń mamyrynda bir mezgilde mindetti áleýmettik medıtsınalyq saqtandyrýdy engize otyryp, memlekettik mindettemelerdiń naqty shegi kórsetilgen tegin medıtsınalyq kómek kóleminiń jańa modelin ázirledi jáne engizý jumystaryn júrgizýde. Tegin medıtsınalyq kómek kóleminiń paketi búkil halyq úshin eń tómengi áleýmettik standart bolady. Alǵashqy medıtsınalyq kómek shuǵyl medıtsınalyq kómekti jáne negizgi, onyń ishinde áleýmettik máni bar aýrýlar kezinde konsýltatsııalyq-dıagnostıkalyq  qyzmetterdi tegin dárilermen qamtamasyz etýdi jáne statsıonarlyq kómekti qamtıtyn bolady», - dedi mınıstr.

Onyń aıtýynsha, mindetti áleýmettik medıtsınalyq saqtandyrý paketi tegin medıtsınalyq kómekten tys qyzmetterdi qamtıdy. Onyń ishinde josparly statsıonarlyq kómek, qymbat turatyn dıagnostıkalyq qyzmetter men tegin medıtsınalyq kómek paketine kirmegen aýrýlar boıynsha dárilik qamtamasyz etý kiredi.

«Onan basqa, tegin medıtsınalyq kómek kóleminiń jańa modeli aıasynda negizgi aýrýlardyń 30 toby boıynsha sáıkes tarıfter men belgilengen qyzmetter tizbesin kezeń-kezeńimen qamtamasyz ete otyryp, konsýltatsııalyq-dıagnostıkalyq qyzmetterdiń kólemin naqty aıqyndaý josparlanýda. Tegin medıtsınalyq kómek kóleminiń jańa modelin engizý jáne áleýmettik medıtsınalyq saqtandyrý qorynan jarnalardyń esebinen alǵashqy medıtsınalyq kómekti qarjylandyrý tapshylyǵyn kezeń-kezeńimen joıýǵa múmkindik beredi. Bul densaýlyq saqtaý júıesiniń uzaq merzimdi qarjylyq turaqtylyǵyn qamtamasyz etedi», - dedi ol.

Mınıstrdiń sózine qaraǵanda, tegin medıtsınalyq kómektiń jańa modelin engizý aıasynda áleýmettik máni bar aýrýlardy qosa alǵanda syrqattardyń 262 tobynnan turatyn dıspanserleýdi arýlardyń 30 tobynan turatyn basqarý baǵdarlamasyna transformatsııalaý usynylady.

«Bul shamamen  70 paıyz ólimdi, 80 paıyz naýqastanýdy, sondaı-aq halyqtyń ómir súrý uzaqtyǵyn aıqyndaıtyn negizgi aýrýlardy baqylaýdy qamtamasyz etedi. Bul rette patsıentti óz aýrýyn basqarýǵa belsendi tartý, birlesken tekserýdi engizý, mobıldik qosymshalardy paıdalaný josparlanýda. Qazirgi kezde barlyq aımaqtarda 3 aýrý boıynsha aýrýlardy basqarý baǵdarlamasy engizilýde. Ol aýrýlardyń asqyný jáne aýrýhanaǵa jatqyzý kórsetkishin tómendetýge eleýli áser berdi»,-  dedi Eljan Birtanov.