«Densaýlyq» baǵdarlamasy ólim-jitimdi azaıtty - Qyzylorda oblysy

QYZYLORDA. QazAqparat - «Densaýlyq» memlekettik baǵdarlamasyn  iske asyrý baǵytynda   qaterli isikter;  jaraqattar; júkti áıelder men perınataldyq kezeńniń patologııalary boıynsha aýrýshandyq, osy syrqattarǵa kórsetilip jatqan medıtsınalyq  kómek sapasy, onyń tolyqtyǵy jáne resýrstar jaǵdaıy   baǵalanyp, jol kartalary bekitildi. 

Ol úshin oblystyq bıýdjetten 1,7 mlrd. teńge shamasynda qarjy bólinip, 150 medıtsınalyq qural-jabdyqtar satyp alyndy, dep habarlaıdy  QazAqparat tilshisi oblystyq densaýlyq saqtaý basqarmasyna silteme jasap.    

Sondaı-aq, 1- deńgeıdegi  bastapqy medıtsınalyq-sanıtarııalyq kómek kórsetý uıymdarynda (BMSK)  barlyq 5 baǵyt boıynsha 89 mamandandyrylǵan kabınet ashyldy.

Buǵan qosa 2-deńgeıde - aýyr ekstragenıtaldi aýrýlarmen bosanǵandar men jaraqattanǵandarǵa, ınsýlt alǵan naýqastarǵa ońaltý jumystaryn júrgizý maqsatynda reabılıtatsııalyq jáne qaıta qalpyna keltirý bólimsheleri ashyldy. Barlyq aýdandyq aýrýhanalarda aýdanaralyq travmatologııalyq bólimshelerdi medıtsınalyq qural- jabdyqtarmen jabdyqtaý jumystary júrgizilýde.

Qaterli isikke shaldyqqan aýyr naýqastardyń ómirin uzartý, kútýge baǵyttalǵan pallıatıvtik kómek kórsetý úshin onkologııa ortalyǵynda 30 tósekke pallıatıvtik bólimshe ashylyp  (hospıs) jáne 7 aýdandyq aýrýhanalarda arnaıy 35 tósek-oryn bólindi. Atqarylǵan jumystar nátıjesinde,  9 aıda jiti mıokard ınfarktinde aýrýshandyq kórsetkishi  8,7 paıyzǵa tómendedi.

Qan aınalym júıesi aýrýlarynan asqynýynyń aldyn alý maqsatynda   oblys boıynsha alǵash ret qaýip-qater toby jasaqtaldy.   Júrgizilgen jumystardyń nátıjesinde 2017 jyldyń 9 aıynda 935 naýqasqa (2016 jyly - 784) koronografııa jasalynyp, stentteý júrgizilý byltyrǵy jylmen salystyrǵanda 4 esege kóbeıgen. Emhanalarda  qaterli isik aýrýlaryna kómek kórsetýdi jetildirý boıynsha  1 deńgeıdegi   profılaktıkalyq kabınettermen jabdyqtaý 45,8 paıyzdan 87,5 paıyzǵa joǵarylady.

Oblysta densaýlyq saqtaý salasynda elektrondy densaýlyq saqtaýdy damytý tujyrymdamasyna sáıkes  salany aqparattandyrý jumystary júıelengen. Tujyrymdama negizinde medıtsınalyq uıymdardyń IT-ınfraqurylymdaryn jaqsartý jáne óziniń  tıimdiligin kórsete bilgen aqparattyq júıelerdi engizý qolǵa alyndy.   

   Sonymen qatar, elektrondy densaýlyq saqtaýdy damytý sheńberinde jergilikti   aqparattyq júıeler  engizilip, Elektrondy ambýlatorlyq kartasynan, Elektrondy aýrý tarıhynan, Elektrondy densaýlyq pasportynan, Elektrondy kezekten jáne t.b., aýmaq deńgeıinde densaýlyq saqtaý salasynda ótpeli protsesterdi avtomattandyrýǵa múmkinshilik beretin  quraldar spektri jasaqtaldy. Búginde emdelýshiler tirkelim emhanasyn derbes tańdaýdy, dárigerdiń qabyldaýyna telefon arqyly jazylýdy «elektrondy úkimettiń» portaly jáne oblystyń medıtsınalyq portaly arqyly  júzege asyra alady. 

 Qazirgi tańda Qyzylorda oblysy boıynsha jergilikti medıtsınalyq aqparattyq júıeler  engizý kórsetkishi 76,5 paıyzdy qurady.

  Bıyl oblystyń densaýlyq saqtaý salasyna 465,0 myń teńgege myńnan asa  kompıýterlik tehnıka alyndy.  Sala boıynsha  kompıýterlik tehnıkamen jabdyqtalý 75,2 paıyzdy quraıdy. Oblystaǵy densaýlyq saqtaý uıymdarynyń ınternet jelisine qoljetimdiligi ortasha alǵanda 75,6 paıyzǵa jetti.

Eske sala ketsek, Memleket basshysy óziniń Ult jospary - bes ınstıtýtsıonaldyq reformany júzege asyrý jónindegi 100 naqty qadam eńbeginiń 80-qadamynda: Mindetti áleýmettik medıtsınalyq saqtandyrýdy engizýdi tapsyrǵan bolatyn. Onda «memleket, jumys berýshi jáne azamattyń yntymaqtasqan jaýapkershiligi qaǵıdaty negizinde densaýlyq saqtaý júıesiniń qarjylyq ornyqtylyǵyn kúsheıtý máselesi kóterildi. Sondaı-aq, bastapqy medıtsınalyq-sanıtarlyq kómekti (BMSK) basymdyqpen qarjylandyrý, bastapqy kómek aýrýdyń aldyn alý jáne erte bastan kúresý úshin ulttyq densaýlyq saqtaýdyń ortalyq býynyna aınalady», - dep naqty aıtyldy.