Densaýlyq saqtaý mınıstrligi balalar lagerlerindegi sanıtarlyq jaǵdaıdy baqylap otyr
ASTANA. KAZINFORM – QR Densaýlyq saqtaý mınıstrligi jazǵy saýyqtyrý maýsymy qarsańynda qala syrtyndaǵy balalar lagerlerinde sanıtarııalyq-epıdemıologııalyq salaýattylyqty qamtamasyz etýge baǵyttalǵan is-sharalar keshenin ótkizedi.
Aldyn alý sharalary. Bıyl sýmen jabdyqtaýdyń jaı-kúıin, tamaq ónimderiniń sapasyn jáne balalar turatyn jerlerde gıgıena normalarynyń saqtalýyn baqylaý sharalary kúsheıtiletin bolady. Ár lagerde qajetti kómek kórsetý úshin medıtsınalyq personaldyń bolýy qarastyrylǵan.
Árbir lagerge bekitilgen yqtımal epıdemıologııalyq jaǵdaılarǵa daıyndyq deńgeıin arttyrý maqsatynda sanıtarııalyq-epıdemıologııalyq qyzmet mamandary saýyqtyrý lagerleriniń qyzmetkerleri úshin 100-den astam oqytý semınarlaryn ótkizdi, 163 lagerde sanıtarııalyq qaǵıdalardyń talaptary boıynsha konsýltatsııalar men túsindirmeler uıymdastyryldy, olardy saqtaý ashylýǵa ruqsat alý úshin qajet.
Balalar men olardyń ata-analaryna jeke gıgıena jáne juqpaly aýrýlardyń aldyn alý máseleleri boıynsha aqparattyq kampanııalar uıymdastyryldy. Áleýmettik jelilerde taratylatyn, sondaı-aq lagerlerde taratylatyn jadynamalar men usynystar ázirlendi.
Monıtorıng jáne baqylaý. Shomylý oryndarynda sý aıdyndarynyń 95 sý synamasy jáne topyraqtyń 41 synamasy iriktelip alyndy, zerthanalyq zertteýler nátıjeleri boıynsha synamalar gıgıenalyq normatıvterge sáıkes keledi.
45 maýsymdyq qala syrtyndaǵy lagerler monıtorınpen qamtyldy (Aqmola – 9, Jetisý – 5, Qostanaı – 6, Qyzylorda – 8, Pavlodar – 7, Soltústik Qazaqstan oblysy-10).
Maýsym boıy sý aıdyndary men bassenderdiń jaı-kúıine turaqty monıtorıng júrgiziletin bolady.
Balalardyń jazǵy lagerde qaýipsiz bolýynyń negizgi talaptary: lager aýmaǵy qorshalýy, aýyz sýdy úzdiksiz berý, ystyq sýmen jabdyqtaý, káriz, jaryqtandyrý, jeldetý uıymdastyrylýy tıis. Barlyq úı-jaılar taza bolýy tıis, ruqsat etilgen jýý jáne dezınfektsııalaý quraldaryn qoldana otyryp, kúndelikti tazalaý júrgizilýi tıis. Saýyqtyrý lagerlerinde kúnine bes ret tamaqtaný kózdeledi jáne medıtsınalyq qyzmet kórsetiledi.
Balalardyń qaýipsiz demalýy úshin kelesi usynystardy oryndaý qajet.
Jazǵy balalar uıymdarynyń ıelerine:
Balalardyń kelýi bastalǵanǵa deıin lagerlerdi ashýǵa ýaqtyly jáne sapaly daıyndaýdy qamtamasyz etý jáne lagerdiń belgilengen sanıtarııalyq-epıdemıologııalyq talaptarǵa sáıkestigin rastaıtyn sanıtarııalyq-epıdemıologııalyq qorytyndy alý.
Jumysqa ruqsaty bar jeke medıtsınalyq kitapshalary joq tulǵalardy balalarmen jáne as blogymen jumys isteýge jibermeńiz. Qyzmetkerlerdi medıtsınalyq tekserýge ýaqtyly jiberińiz.
Balalardyń sany lagerdiń qýatyna (jatyn bólmeleri, as blogyndaǵy tehnologııalyq jabdyqtar) sáıkes kelýi tıis.
Balalar aýrýynyń alǵashqy belgilerinde – jaqyn jerdegi medıtsınalyq uıymǵa habarlasyńyz.
Ata-analarǵa:
Lagerdi tańdaý kezinde Qazaqstan Respýblıkasy Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń saıtynda ornalastyrylǵan balalar saýyqtyrý uıymdarynyń tizbesin basshylyqqa alý qajet.
Balany qala mańyndaǵy lagerge jibermes buryn onyń ál-aýqatyn tekserińiz. Balanyń allergııasy, sozylmaly aýrýlary jáne taǵamdyq artyqshylyqtary týraly erip júretin adamǵa (muǵalimge) aldyn-ala eskertińiz, bul týraly balanyń medıtsınalyq anyqtamasyna da jazba jasalýy kerek.
Buzýshylyqtardyń barlyq faktileri boıynsha Komıtettiń aýmaqtyq bólimshesine júginý qajet (baılanys telefondary men mekenjaılary resmı saıttarda ornalastyrylǵan).
