«Densaýlyq pasporty» anyqtama túrinde emhanalarda tegin beriledi

ASTANA. KAZINFORM — Birinshi synyp oqýshylarynyń ata-analaryna «Densaýlyq pasporty» kitabyn satyp alýdyń qajeti joq. Endi ol tirkelgen jeri boıynsha emhanalarda anyqtama túrinde tegin beriledi, al bolashaqta tsıfrlandyrylmaq. Bul týraly OKQ alańynda ótken dóńgelek ústel barysynda QR Densaýlyq saqtaý mınıstrligi Ana men bala densaýlyǵyn saqtaý departamenti dırektorynyń m. a. Áıgerim Ospanova aıtty.

Onyń aıtýynsha, elimizdiń barlyq respýblıkalyq jáne óńirlik balalar aýrýhanasynda 25 myńnan astam tósek-oryn qarastyrylǵan. 2023 jyly táýlik boıy jáne kúndizgi statsıonar quramynda 82 myńnan astam bala emdeldi, 40 myńnan astam bala ambýlatorııalyq deńgeıde medıtsınalyq kómek aldy. 18 jasqa deıingi balalar medıtsınalyq kómekti tegin alady. 

Tuqym qýalaıtyn týa bitken aýrýlardy jáne damýdaǵy aýytqýshylyqtardy erte anyqtaý úshin týǵannan keıingi alǵashqy kúnderde skrınıngtiń 4 túri qarastyrylǵan. Jyl saıyn týǵannan 18 jasqa deıingi balalarǵa profılaktıkalyq tekserýler júrgiziledi, 2023 jyly 5, 5 mln-nan astam bala qamtyldy.

«Balalar densaýlyǵyn saqtaýdyń basty jetistikteriniń biri - joǵary mamandandyrylǵan medıtsınalyq kómekti damytý. Byltyr týa bitken júrek aqaýy bar 1708 balaǵa ashyq júrekke operatsııa jasaldy, 47%-y bir jasqa deıingi balalarǵa jasaldy. Jańa týǵan nárestelerdegi mınımaldy ınvazıvti endovıdeohırýrgııanyń úlesi 40%-ǵa deıin ósti. Asa aýyr jaǵdaılarda balalardyń ómirin qutqarý úshin Qazaqstanda telemedıtsınalyq tehnologııalar men medıtsınalyq avıatsııa iske asyryldy. Sońǵy 3 jylda elimizde qalpyna keltirý jáne ońaltý boıynsha tósek-oryn sany 2 esege artty. Qazir 4219 tósek-oryn bar», – dep atap ótti spıker.

Balalar múgedektiginiń aldyn alý maqsatynda barlyq óńirde uryqty qorǵaýdyń 20 ortalyǵy quryldy. Mektepke deıingi jáne mektep medıtsınasy basqarmasy quryldy. Balalarǵa profılaktıkalyq kómekti jetildirý úshin Oqý-aǵartý mınıstrligi balalardy zorlyq-zombylyqtan qorǵaý, sýıtsıdtiń aldyn alý jáne olardyń quqyqtary men ál-aýqatyn qamtamasyz etý boıynsha birlesken jumys júrgizip jatyr.