Denıs Tenniń soqqy jegenin kórgen eki polıtseı sotqa tartylýy múmkin

ALMATY. QazAqparat - Almatyda Denıs Tenniń urylarmen jaǵa jyrtysyp jatqanyn kórgen polıtseıler jaýapqa tartylýy múmkin. Bul týraly búgingi aldyn ala sot tyńdalymy barysynda jábirlenýshi taraptyń qorǵaýshysy Nurlan Óstemirov aıtty, dep habarlaıdy QazAqparat tilshisi.

«Vıdeosy bar. Kýágerler túsip qalǵan. Eki polıtsııa qyzmetkeri júr. Olar ne istep júr onda? Qazir olarǵa qatysty ulttyq bıýro qylmystyq is qozǵap jatyr. Biraq olar ázirge shara qabyldamaǵany úshin tartylyp jatyr. Tapsyrys berýshiler bolýy yqtımal. Qııasov Denıstiń ólimin óz moınyna alyp otyr. Vıdeoda kóringendeı ol artqy jaǵynnan kelgen. Al artqy jaǵyndaǵy adam qalaısha adamnyń aldyna kelip, sanynyń ishki jaǵynan pyshaqtyń júzin joǵary qarata tiledi. Týra has sheber sııaqty. Tamyryn tilý úshin istelgen dep oılaımyz. Sondyqtan, iste basqa da kúdiktiler bolýy múmkin ekenin joqqa shyǵarmaımyz», - dedi qorǵaýshy Óstemirov.

Munyń aldynda  sottalýshylardyń jeke basy týraly məlimet belgili boldy. Sottalýshy Janar Tolybaeva óziniń júktiliktiń 6,5  aılyǵynda ekenin məlimdegen bolatyn.

Kelesi sot otyrysy 3 qańtarǵa tańerteńgi 10-ǵa belgilendi.

Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.

Denıs Tenniń ólimine qatysty qylmystyq isqozǵalyp, kúdiktiler izdestirildi. Elbasy Denıs Tenge qatysty qylmysty muqııat tekserýdi tapsyrdy. Keıin QR ІІM kúdiktilerdiń ustalǵanyn jarııa etti.

Al, qyrkúıek aıynyń sońynda Іshki ister mınıstri Qalmuhanbet Qasymov atalmysh qylmystyq istiń tergelýine qatysty málimet bergen bolatyn.

Búgin Almaty qylmystyq ister boıynsha aýdanaralyq mamandandyrylǵan sotta belgili sportshynyń ólimi boıynsha aldyn ala sot tyńdalymy ótti.