Denıs Tenniń sheteldegi jankúıerleri Qazaqstan elshilikterine kelip aza tutýda

ASTANA. QazAqparat - Qaskóıler qolynan qaza tapqan sportshy Denıs Tenniń túrli memleketterdegi jankúıerleri Qazaqstan elshilikteri aldyna gúl ákelip jatyr, dep habarlaıdy QazAqparat tilshisi.

«Keshe Latvııa astanasyndaǵy Qazaqstan konsýldyǵy aldyna Denıs Tendi eske alýǵa kelgen adamdar jınaldy. Búgin Máskeýdegi QR Elshiliginde kóńil aıtý kitaby ashyldy», - dep habarlady QR Syrtqy ister mınıstrliginiń resmı ókili Aıbek Smadııarov QazAqparat tilshisine.

Sonymen birge, Reseıdegi Qazaqstan elshiligi Denıs Tendi qurmetpen eske alǵysy kelgender úshin ǵımarat aldyna sportshynyń portretin qoıdy. Odan bólek, Chehııadaǵy Qazaqstan Elshiligi ǵımaraty aldyna Denıs Tenniń jankúıerleri maısham men gúl ákelip jatyr.

«Chehııa men Slovakııadaǵy Qazaqstan Elshiligi aramyzdan erte ketken qazaqstandyq sportshynyń jaqyndary men týystaryna kóńil aıtady», - delingen habarlamada.

19 shilde kúni Almatyda Qazaqstan halqynyń eń súıikti sportshylarynyń biri Denıs Ten qaskóıler qolynan qaza tapty. Memleket basshysy Nursultan Nazarbaev Denıs Tenniń ata-anasyna qońyraý shalyp, kóńil aıtty.