Denıs Tenniń ólimine qatysty sot otyrysy jalǵasyp jatyr
Sot aldynda úsh adam jaýap berýde. Olar - QR QK 434-baby, QR QK 24-babynyń 3-bólimi, 188-babynyń 2-bóliminiń 1- tarmaǵy boıynsha aıyptalǵan Janar Tolybaeva, QR QK 188-babynyń 2-bóliminiń 1 tarmaǵy, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Arman Qudaıbergenov, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Nuraly Qııasov. Qylmystyq is 38 tomnan turady.
Sot májilisinen shyqqan soń sottalýshy Janar Tolybaevanyń qorǵaýshysy Amangeldi Sarıev jýrnalısterge túsinikteme berdi.
Onyń aıtýynsha, bul qylmys tapsyryspen jasaldy degen qısynǵa kelmeıdi.
«Bul qylmysqa eshkimniń, úshinshi, tórtinshi adamdardyń qatysy baryna dálel joq. Munda adamdy óltirý quramy joq. Kórdińizder ǵoı, telefondary, aqshasy, aıfony, kóliktiń aınasy bári qalǵan. Qaraqshylyq jasaǵysy kelse, sýmkany bosatyp alyp ketpeı me», - dedi Janar Tolybaevanyń qorǵaýshysy Amangeldi Sarıev.
Onyń aıtýynsha, Janar Tolybaeva Tenniń ólgenin Qapshaǵaıda qydyryp júrgende estigen
Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denıs Tenniń ólimine qatysty qylmystyq is qozǵalyp, kúdiktiler izdestirildi. Elbasy Denıs Tenge qatysty qylmysty muqııat tekserýdi tapsyrdy. Keıin QR ІІM kúdiktilerdiń ustalǵanyn jarııa etti. Al, qyrkúıek aıynyń sońynda Іshki ister mınıstri Qalmuhanbet Qasymov atalmysh qylmystyq istiń tergelýine qatysty málimet bergen bolatyn. 25 jeltoqsanda Almaty qylmystyq ister boıynsha aýdanaralyq mamandandyrylǵan sotta belgili sportshynyń ólimi boıynsha aldyn ala sot tyńdalymy ótken bolatyn.
