Denıs Tenniń aqtyq saparynda qoǵam qaıratkerleri men sportshylar kóńil aıtty
«Bul kúni Denıstiń jaqyndaryna kóńil aıtýǵa da sóz tabý qıyn. Bul úlken qaıǵy jáne barlyǵymyz úshin sabaq boldy. Mundaı qatelikke endi jol bermeý kerek. Qosh bol jáne bizdi keshir, Denıs», - dedi QR Aqparat jáne kommýnıkatsııalar mınıstri Dáýren Abaev sportshymen qoshtasý rásiminde.
Qoshtasýǵa kelgen Ońtústik Koreıa Respýblıkasynyń Qazaqstandaǵy elshisi Kım De Sık Denıs Tenniń ólimin Qazaqstan úshin ǵana emes, álemdik qaýymdastyq úshin orny tolmas qaıǵy dep baǵalady. Elshi Denıstiń táýelsizdik úshin kúresken tanymal koreı generaly Mın Gyn Honyń urpaǵy ekenin eske saldy.
«Asyl dosymyzdy eshqashan umytpaımyz», - dedi elshi.
Sonymen birge, Denıspen qoshtasýǵa Qazaqstandaǵy Japonııa elshisi Itıro Kavabata da keldi. Ol Kúnshyǵys elindegi tabynýshylary atynan Denıs Tenniń otbasyna jáne barsha Qazaqstan halqyna kóńil aıtty.
«Bizdiń halqymyz Denıstiń qos memleket arasyndaǵy dostyq qarym-qatynastardy nyǵaıtýyna qosqan úlesin joǵary baǵalaıdy. Kóptegen japondyq mánerlep syrǵanaýshylar qaıǵyǵa ortaqtasyp jatyr. Bul qaıǵyly habar Japonııa azamattaryna da aýyr tıdi. Denıs Tenniń tańǵajaıyp óneri men tulǵalyq kelbeti máńgi esimizde qalady», - dedi dıplomat.
Odan keıin Denıstiń qazasyna baılanysty qazaqstandyq boksshy Danııar Eleýsinov jáne Konkımen júgirý sporty boıynsha Álem Kýbogy (1995) kezeńiniń jeńimpazy bolǵan Vadım Shakshabaev sóz sóıledi jáne kóz jastaryn tyıa almaǵan astanalyqtar Denıs Tendi «Keshir, qosh bol» sózderimen shyǵaryp saldy.
Aıta keteıik, qazaqstandyq sportshy Denıs Ten 19 shilde kúni pyshaqtan alǵan jaraqattan qaıtys boldy. Sportshy kóliginiń aınasyn urlamaq bolǵan eki adamnyń qylmysynyń ústinen túsken. Arada bastalǵan janjaldyń saldarynan urylar Denıs Tenge pyshaq salǵan.
