Denıs Tenge qastandyq jasalǵan mańda urylar taǵy bir avtokóliktiń aınasyn syndyrǵan

ALMATY.QazAqparat - Shildeniń 21-ne qaraǵan túni Denıs Tenge qastandyq jasalǵan jerge jaqyn mańda jazýshy Ilıa Odegovtyń kóliginiń aınasyn belgisiz bireýler syndyryp ketken, dep habarlaıdy QazAqparat tilshisi.

«Búgin túnde saǵat 3-terdiń shamasynda belgisiz bireýler kóligimniń aınasyn syndyryp, ishine kirmek bolǵan. Bul meniń úıimniń qasynda, kúni keshe Denıske qastandyq jasalǵan jerden 100-150 metr qashyqtyqta boldy. Kóshe jaqtan qatty daýysty estigende áli uıyqtamaǵan edim. Sosyn avtokóliktiń sıgnaly oınap qoıa berdi. Terezeden qaraǵanymda kóliktiń janynan eki adamdy kórip qaldym »,-dep jazǵan ol paraqshasynda.

Jazýshy urylarmen baılanysýdyń qaýipti ekenin aıttty.

«Men mundaı adamdarmen betpe-bet kelýdiń qaýipti ekenin bilemin. Ókinishke oraı, buǵan Denıs Tenniń qazasy mysal bola alady. Alaıda óz múlkińdi bireýdiń ıelenbek bolǵanyn kórip qalaı qarap turarsyń. Sol túni qolyma gaıka buraıtyn kiltimdy alyp syrtqa atyp shyqtym (qolyma túskeni sol boldy). Qarasam endigi eshkim joq. Men qylmyskerlerdi qorqytyp jibergen bolýym kerek, olar osy jaqyn jerge jasyrynyp qaldy. Qarańǵyda áldekimderdiń sybyrlaǵan daýystary estildi»,-delingen jazbada.

Ilıa Odegov túngi saǵat 3-te polıtsııa bólimshesine habarlasyp, bolǵan jaıdy aıtqan. Olar 10-15 mınýttan soń partrýldi jiberemiz degen. Osy ýaqyt boıy jazýshy kóligin kúzetip dalada turǵan. Biraq tergeýshiler 50 mınýt ótken soń ǵana oqıǵa ornyna jetken. Aryz jazý jumystary tańǵy 5.30-ǵa deıin sozylǵan.

«Eń qorqynyshtysy bul oqıǵanyń Denıs Tenniń qazasynan keıin, tipti dál sol mańda bolyp turǵanynda. Kóterilgen shýǵa, bul aýdandy polıtseılerdiń torýyldap júrgenine qaramastan qaraqshylar qorqatyn emes»,-degen jazýshy.

Ilıa Odegovtyń aıttýynsha, biraz jyldan beri turyp kele jatqan aýdanynda avtokólik urylarynan kóresini kórgen.

«Qansha jyldan beri kóligimdi esik aldyna qoıamyn. Ony syryp ketken kezderi de boldy. Birde esiktiń qaqpaqshalary men biteýishterin alyp ketti. Osyndaı usaq-túıek qana bolmasa kólemdi zattar urlanǵan joq. Onyń ústine kóligime qundy zattardy qaldyrmaıtyn edim»,-degen ol.

Almaty ІІD atalǵan oqıǵaǵa qatysty aqparatty 23 shilde dúısenbi kúni beretin boldy.

Eske sala keteıik, 19 shilde kúni kúndiz Denıs Ten kóliginiń aınasyn urlamaq bolǵandardyń ústinen túsken bolatyn. Urylardy ustaımyn dep júrgende pyshaqqa túsken sportshy aýrýhanada qaıtys boldy.

Illıýstratsııalyq foto