Denıs Tendi óltirgender ómir boıyna abaqtyǵa jabylýy múmkin
Atyshýly is boıynsha sotqa deıingi tergeý jumystary QR Qylmystyq kodeksiniń 99-baby, 2-bóligi - adam óltirý boıynsha júrgizilýde.
Bul bapqa sáıkes, adam óltirgen qylmysker 15 jyldan 20 jylǵa deıingi merzimge sottalýy nemese ómir boıyna bas bostandyǵynan aıyrylýy múmkin. Sondaı-aq dúnıe-múlkin tárkileý qarastyrylǵan.
Qylmystyq kodekstiń 99-baby, 2-bóligi paıda tabý maqsatymen, sol sııaqty jaldanyp jasalǵan ne qaraqshylyqpen nemese qorqytýmen baılanysty adam óltirý qylmystaryn kózdeıdi.
Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Adam óltirý babymen qylmystyq is qozǵaldy.
Búgin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
25 jasynda ómiri úzilgen sportshymen qoshtasý rásimi 21 shilde kúni Almatydaǵy Balýan Sholaq atyndaǵy sport saraıynda ótedi. Bastalýy - saǵat 10:00-de. Sondaı-aq bir mezgildegi qoshtasý rásimi 21 shilde kúni Astanada qalasyndaǵy "Barys-Arena" stadıonynda ótedi.
