Denıs Tendi óltirdi degen kúdikti buǵan deıin úsh ret isti bolǵan
QR ІІM-niń baspasóz qyzmeti kúdiktilerdiń biri ustalyp, ýaqytsha ustaý ızolıatoryna qamalǵanyn málim etken bolatyn.
Kúdikti, 1994 jyly Jambyl oblysynda týǵan Nuraly Qııasov óziniń jasaǵan qylmysyn moıyndady.
Anyqtalǵandaı, Merki aýylynda týǵan 24 jastaǵy Nuraly Qııasovty 2017 jyly quqyq qorǵaý organdary úsh ret jaýapqa tartqan.
Atap aıtqanda, ótken jyldyń qańtarynda ol mas kúıinde avtokólik basqarǵany úshin ustalyp, sýdıa Rahat Razaqovtyń tóraǵalyǵymen Merki soty ony úsh jylǵa júrgizýshi kýáliginen aıyrǵan: «Qııasov Nuraly Dáýletbekuly 2017 jylǵy 14 qańtar kúni tańerteń saǵat 07:38-de Jambyl oblysynyń Merki aýylynda «Mazda 626» markaly mashınany mas kúıinde júrgizgen. 31 qańtarda Merki aýdandyq sotynyń qaýlysymen úsh jyl merzimge júrgizýshi quqyǵynan aıyrylǵan», - delingen QR Joǵarǵy sotynyń «Sot kabıneti» saıtynda. Bul rette, onyń sot otyrysyna qatyspaǵany jáne kelmeýiniń sebebin túsindirmegeni atap ótilgen.
Naýryz aıynda Merki aýdandyq sotynyń sýdıasy Abaı Dáýrenbekovtiń tóraǵalyǵymen taǵy bir sot otyrysy ótti. Urlyqqa qatysty qylmystyq is boıynsha sot talqylaýlary bir aı boıy júrdi.
Sottalýshyǵa mashına akkýmýlıatory men magnıtofonyn qoldy etti degen eki urlyq deregi boıynsha aıyp taǵyldy: «2017 jylǵy 17 aqpan kúni túngi saǵat 02:30 shamasynda D. Qııasov Merkide aýyldasy A. Baınazarovpen birge kóshede kele jatqan. «Aýdı-80» avtomashınasyn kórip, eshkim joqta avtomobıldiń aldyńǵy terezesin syndyryp, 14 myń teńge turatyn DVD-pleerdi, 2 myń teńge turatyn magnıtofondy alǵan. Sodan keıin avtomashınanyń kapotyn ashyp, 8 myń teńge turatyn akkýmýlıatoryn urlaǵan. Jalpy materıaldyq zalal 24 myń teńgeni qurady. Budan soń ol aýyldasymen birge oqıǵa ornynan izin sýytqan», - delingen is materıaldarynda.
Biraq sotta taraptar keltirilgen zııandy óteý týraly kelisimge kelip, jábirlenýshiler uryny keshirgendikten, sot ony bostandyǵynan aıyrmaı, ákimshilik jazamen shektelgen.
2017 jyly Nuraly Qııasov shaǵyn nesıe uıymyna qaryzy boıynsha úshinshi ret sot talqylaýyna tartylǵan. Qııasov 144 myń teńgeden astam soma bereshek bolǵan.
16 qazanda Merki aýdandyq sotynyń sýdıasy Erkin Kenbaev «KMF (KMF)» Shaǵyn nesıe uıymy» JShS-niń N.D. Qııasovqa qatysty nesıesiniń, memlekettik bajdyń, sot shyǵyndaryn tóleý týraly talap aryzyn qarap», «... osy talap aryz boıynsha azamattyq is qozǵaý týraly» sheshim shyǵarǵan. Al 2018 jyldyń 8 qańtarynda is arhıvke jiberilgen.
Eske sala keteıik, mánerlep syrǵanaýshy Denıs Ten 19 shilde kúni tús kezinde pyshaq jaraqatymen aýrýhanaǵa jetkizildi. Almaty ІІD málimetinshe, belgisiz adamdar sportshynyń mashınasynyń aınasyn urlamaq bolǵan. Keıinnen urlyqtyń ústinen túsken Denıske qylmyskerler pyshaq suǵyp alǵan. Zardap shegýshi 3 lıtr qan joǵaltty. Dárigerler onyń jaǵdaıyn óte aýyr dep baǵalaǵan. Artynsha, QR Densaýlyq saqtaý mınıstrliginiń baspasóz hatshysy Ernar Ákimqulov sportshynyń qaıtys bolǵanyn málimdedi.
Denıs Tendi óltirdi degen kúdikke ilingen ekinshi adam - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
