Denıs Ten ólimi: Eki kúdiktiniń túsiniktemeleri bir-birine qaıshy kelip tur

ASTANA. QazAqparat - Mánerlep syrǵanaýshy Denıs Tenge qastandyq jasady degen kúdikpen ustalǵan Nuraly Qııasov pen Arman Qudaıbergenovtyń bergen túsiniktemeleri ár túrli, dep habarlaıdy QazAqparat tilshi QR Іshki ister mınıstriniń orynbasary Rashıd Jaqypovqa silteme jasap.

Buǵan deıin Nurlan Qııasov «Denıs Tendi urmadym, pyshaq salmadym, jáı ǵana qarap turdym» dep málimdegen bolatyn. Keıinirek ekinshi kúdikti Arman Qudaıbergenov sportshyǵa eki ret pyshaq salǵanyn moıyndady. Alaıda, betpe-bet kezdesý barysynda Nurlan Qııasov pyshaqty ózi salǵanyn moıyndady.

«Kúdiktilerdiń aýyr qylmysty bir-birine silteýi búgin ashylǵan jańalyq emes. Qazirgi ýaqytta oqıǵanyń mán-jaıyn, qaı kúdiktiniń pyshaq jumsaǵanyn tolyq anyqtaýǵa múmkindik beretin saraptamalar júrgizip jatyrmyz. Eki kúdiktiniń túsiniktemeleri bir-birine qaıshy kelip tur, naqty saraptamalardan soń pyshaqtyń kimniń qolynda bolǵanyn naqty anyqtaımyz», - dedi QR Іshki ister mınıstriniń orynbasary Rashıd Jaqypov Denıs Ten ólimin tergeý týraly arnaıy brıfıngte. 

Aıta ketsek, Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn. 

2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy. 

Adam óltirý babymen qylmystyq is qozǵaldy.

Keıin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.

Sondaı-aq,  Denıs Tenniń ólimine kúdikti Nuraly Qııasov kúzetpen Almaly aýdandyq sotyna jetkizilgen.

Al Denıs Tenniń ólimi boıynsha kúdikti ekinshi adam Arman Qudaıbergenov ustaldy.