Demokrattar men respýblıkalyqtar Trampqa qarsy ımpıchmentti qoldamady

ASTANA. KAZINFORM – Ókilder palatasynyń demokrattary basym daýyspen respýblıkalyqtarǵa qosylyp, Donald Trampqa Irannyń ıadrolyq nysandaryna birjaqty soqqy bergeni úshin ımpıchment jarııalaýdy daýysqa salýǵa qarsy shyqty, dep habarlaıdy Kazinform menshikti tilshisi.

Bul demokrattardyń kópshiligi Trampqa ımpıchment jarııalaý ıdeıasynyń ózine narazy ekenin bildiredi, dep jazady Axios.

Kongressmen El Grın (Tehastan saılanǵan demokrat) ımpıchment týraly qarar boıynsha daýys berýdi tabandy talap etken. Qujatta Trampqa «bılikti bólý», «Kongress quqyǵyn Konstıtýtsııaǵa qarsy ýzýrpatsııalaý arqyly amerıkalyq demokratııany avtorıtarızmge aınaldyrý» sııaqty aıyptar taǵylǵan.

Qujatta Tramptyń soqqy jasaýǵa Kongresten ruqsat suramaǵany AQSh kúshterine tótenshe qaýip tónip turǵany týraly eshqandaı dálelder keltirilmegeni aıtylǵan.

Ókilder palatasynyń Respýblıkalyq partııasynan Grınniń ımpıchmentin qabyldamaý týraly usynysty 344 adam qoldap, 79 adam qarsy daýys bergen.

128 demokrat Grınniń zań jobasyn qaıtarý usynysy boıynsha respýblıkalyqtardy qoldady. Olardyń arasynda Hakım Djeffrıs (Nıý-Iorkten saılanǵan demokrat, ókilder palatasyndaǵy azshylyqtar kóshbasshysy) jáne Nensı Pelosı (Ókilder palatasynyń burynǵy spıkeri, Kalıfornııadan saılanǵan demokrat) bar.

Osyǵan deıin respýblıkalyqtar men demokrattardan bir top adam Taıaý Shyǵysta soǵysty bastamas buryn Kongrestiń maquldaýyn talap etetin qarar boıynsha daýys berýdi uıymdastyrmaq bolǵany týraly habarlandy.

Osyǵan deıin Tramptyń Irannyń ıadrolyq nysandarynyń tolyq joıylatynyn málimdegeni týraly jazdyq.