«Demikpeni dendetip júrgen kimder?» - respýblıkalyq basylymdarǵa sholý
***
«Egemen Qazaqstan» basylymynyń jazýynsha, 2012 jyldyń tamyzynda eýroaımaqta jumyssyzdyq 11,4 paıyzdy qurady. Bul deńgeı 1995 jyldan keıingi rekordtyq kórsetkish bolyp tabylady jáne Bloomberg saýalnama júrgizgen ekonomıster boljamdarynyń medıandyq mańyzymen sáıkes keledi. Óńirdegi boryshtyq daǵdarystyń damýy aıasynda jumyssyzdyq deńgeıi rekordtyq mańyzǵa jetti, al ol kompanııalarda jumys oryndaryn qysqartýǵa aparyp soqtyrdy. Búginde eýropalyq kompanııalar jaqyndap kele jatqan retsessııadan, qatań bıýdjettik sharalardan jáne álemdik ekonomıka ósýiniń baıaýlaýynan qaýiptene otyryp qabyldaǵan ınvestıtsııalyq sheshimderin keıinge qaldyrýda jáne jańa qyzmetkerlerdi jaldaýdan bas tartýda. Eýro aımaǵyndaǵy jumyssyzdyq máselesin kótergen bul materıal «Jumyssyzdyq eýroaımaqta rekordqa jetti» degen taqyryppen berilip otyr.
Sondaı-aq osy basylymnyń jazýynsha, turǵyndardy jumyspen barynsha kóbirek qamtýǵa múmkindik beretin áleýmettik mańyzy zor salanyń biri - jeńil ónerkásip. Álemdik tájirıbege kóz salsaq, tek osy jeńil ónerkásiptiń ózinen bıýdjetiniń 40 paıyzǵa jýyǵyn qurap, ekonomıkasyna ájeptáýir paıda keltirip otyrǵan elder bar ekenine kóz jetkizemiz. Aıtalyq, Internetten alynǵan derekter Úndistan, Qytaı jáne Túrkııa memleketterinde halyqtyń 20 paıyzy osy kásippen shuǵyldanatynyn aıǵaqtaıdy. Buǵan sol elderde erkin ekonomıkalyq aımaqtardyń qurylýy, jeńildetilgen salyqtar men paıyzy tómen nesıeler jáne memlekettik ınvestıtsııalar oń yqpalyn tıgizgen. Atalmysh mańyzdy salanyń mán-jaıy «Egemen Qazaqstan» basylymynyń búgingi sanyndaǵy «Jeńil ónerkásiptiń aýyr júgi» atty maqalada basyldy.
***
«Shymkent qalasynyń aýmaǵynda arheologtar saq dáýiriniń 2,5 myń jyldyq qorymyn qazyp aldy»,-dep habarlady Á, Marǵulan atyndaǵy arheologııa ınstıtýtynyń dırektory Baýyrjan Baıtanaev. «Arheologtarmen saq dáýiriniń qorymynan eki altyn tabaqsha tabyldy. Ikonografııaǵa qarasańyz, tabylǵan zattar grek-rım ýaqytynda jasalǵan. Bul zattardy teńiz ben muhıtty jaqsy bilgen halyq jasaýy yqtımal. Altyn tabaqshalarda teńiz janýarlary: balyq, segizaıaq, teńiz aty beıelengen. Bul tabaqshalar kıimge taǵýly bolǵanǵa uqsaıdy. Qazir biz bul zattardyń saqtarǵa qalaı túskenin anyqtaý ústindemiz»,-deıdi mamandar. Bul týraly «Aıqyn» basylymynyń búgingi sanyndaǵy «Saq dáýiriniń qorymy tabyldy» atty aqparatta jazylǵan.
«Pavlodar oblystyq Ekonomıkalyq jáne sybaılas jemqorlyqqa qarsy kúres departamentiniń qyzmetkerleri sońǵy ýaqytta jalǵan aqsha jasaýshylarmen kúresti kúsheıte tústi. Oblystyq Qarjy polıtsııasy baspasóz qyzmetiniń jetekshisi Samal Ahmedıanova habarlaǵanyndaı, aımaqta sońǵy aılardyń ózinde jalǵan aqsha jasaýshylarǵa qatysty 150 qylmystyq oqıǵa tirkelip, onyń 108- boıynsha dereý qylmystyq is qozǵalyp, onyń ishinde, 58 qylmys shuǵyl jaǵdaıda ashyldy»,-dep jazady «Aıqyn» basylymy búgingi sanynda. Óńirdegi osy qylmystyń túri jaıynda jazylǵan materıal «Jalǵan aqsha jasaýshylar kóbeıdi» atty taqyryppen basyldy.
***
«Alash aınasy» basylymy búgingi sanynda «Demikpeni dendetip júrgen kimder?» atty maqalany jarııalady. Basylymnyń jazýynsha, búginde álemde 300 mıllıon adam demikpe dertinen zardap shegedi. Medıtsına myqty damyp keledi degenmen de, dál osy dıagnozdyń aldynda dármensizdik tanytýda. Mamandar munyń sebebin qorshaǵan ortanyń aeroallergendermen lastanýynan, kúndelikti tutynatyn taǵamdarda beıtabıǵı qospalardyń kóp bolýynan, túrli hımııalyq untaqtardy paıdalanýdan kórip otyr. Naýqastardyń naqty sany tizimge tirkelgenderden bes-alty esege kóp, deıdi mamandar.
