Demalys aımaqtarynyń jumysyna shekteý qoıylady – ІІM

NUR-SULTAN. QazAqparat – Qazaqstanda demalys aımaqtarynyń jumysyna shekteý engiziledi. Bul týraly QR Іshki ister vıtse-mınıstri Alekseı Kalaıchıdı aıtyp berdi, dep habarlaıdy QazAqparat.

«Ókinishke qaraı, tipti úı jaǵdaıynda azamattar kóptep jınalyp, merekelik, bata oqý jıyndaryn ótkizip keledi. Ázirge mundaı 48 fakti tirkeldi. Ásirese Atyraý (14) men Shymkent (11) qalalarynda zańbuzýshylyqtar kóp. Osyǵan baılanysty qaýipti ınfektsııalyq aýrýdy taratpaý maqsatynda demalys aımaqtarynyń jumysyna da shekteý engiziledi. Sondyqtan el turǵyndaryna munyń qaýipsizdik úshin qajetti shara ekenin aıtqym keledi», - dedi spıker Ortalyq kommýnıkatsııalar qyzmetinde ótken onlaın brıfıngte.

Vıtse-mınıstr koronavırýs ınfektsııasyn jeńgen memleketterde birinshi orynda – azamattardyń ózindik tártibi turǵanyn atap ótti.

«Árqaısysymyz qaýipsizdik sharalaryn saqtap júrsek, elimizdiń epıdemıologııalyq jaǵdaıy da jaqsarady. Bul - ózimiz ben jaqyndarymyzdyń ómiri úshin mańyzdy», - dedi A. Kalaıchıdı.