Demalys núkteleri: elorda qysqy maýsymǵa qalaı daıyndaldy

ASTANA. KAZINFORM — Bıyl sýyq kesh kelgenimen, Astana parkteri qysqy maýsymǵa saqadaı saı. Qala kósheleri bezendirilip, jańa jyldyq jaryq ınstallıatsııalary ornatylǵan.

Turǵyndar men qala qonaqtary qaıda baryp demala alady? Elordada qandaı demalys oryndary kelýshilerdi qarsy alýǵa daıyn? Kazinform tilshisi anyqtap kórdi.

Qysqy maýsymǵa erekshe daıyndalǵan aýdandardyń kóshin Baıqońyr bastap tur. Munda aýdan boıynsha barlyǵy 9 núktede jańa jyldyq bezendirý jumystary júrgizilgen. Olardyń 6-aýy turǵyn alaptarda ornalasqan.

– Aýdan boıynsha barlyǵy 2 muz aıdyny bar. Olar «Jastar» saraıy jáne «Atatúrk» saıabaǵy aýmaǵynda ornalasqan. Odan bólek, aýdan boıynsha 9 syrǵanaq, 7 shyrsha, 24 shaǵyn sáýlettik nysandar (Aıaz ata, Aqshaqar, buǵy, aıý, barys, qoıan, syılyqtar, arkalar, ortalyq kópirde: «Jańa jylyńyzben» jazaýy) boı kóterdi, – deıdi aýdan ákimdigi Kazinform tilshisiniń resmı saýalyna bergen jaýabynda.

Al J.Táshenev kóshesi, Respýblıka jáne Abaı dańǵyldary boıynda aǵashtar jańa jyldyq jaryq gırlıandalarymen ásemdelgen. Jalpy uzyndyǵy 5 shaqyrymnan asatyn aýmaqta 400-den astam aǵash merekelik jaryqpen kómkerilipti. Sonymen qatar Abaı dańǵyly boıyndaǵy Jazýshylar saıabaǵynda 51 shyrsha men 42 kolonna jaryq gırlıandalarymen bezendirilgen.

– Saıabaqtardaǵy qysqy bezendirý jumystaryn konkýrstyq rásimder arqyly anyqtalǵan merdiger uıymdar júzege asyryp jatyr. Qysqy ınfraqurylymdy tolyq iske qosý jyl sońyna deıin kezeń-kezeńimen júzege asyrylady, naqty merzimdik keste bekitilgen. Qysqy saıabaqtardy daıyndaý bıýdjeti aıasynda muz aıdyndary men syrǵanaqtardy ornatý, jaryqtandyrý, shaǵyn sáýlettik nysandardy ornalastyrý jáne kútip-ustaý jumystary qarastyrylǵan, – deıdi ákimdik mamandar.

Syrǵanaqtardy muzdatý úshin dástúrli sý quıý tehnologııasy qoldanylady.

– Aýa temperatýrasy talapqa saı bolmaǵan jaǵdaıda syrǵanaqtardy tolyq kólemde iske qosý ýaqytsha shekteledi. Qysqy saıabaqtardy daıyndaýǵa bólingen qarajat bekitilgen bıýdjet aıasynda qarastyrylǵan jáne ol muz aıdyndaryn, syrǵanaqtardy, bezendirý elementterin ornatý men tehnıkalyq qyzmet kórsetýge baǵyttalǵan. Ortalyq saıabaqtaǵy ózen betteri qatpaǵan ýchaskelerde qorshaýlar ornatylyp, eskertý belgileri qoıyldy, sondaı-aq turaqty baqylaý uıymdastyrylǵan, – deıdi mamandar.

Al Saryarqa aýdanynda qysqy demalysyńyzdy sapaly ótkizý úshin 5 lokatsııaǵa bara alasyz.

– Olar: Beıbitshilik kóshesindegi «Qalalyq alań», Bógenbaı batyr dańǵyly, 43 mekenjaıyndaǵy alań, «Kóktal» parki, Oqjetpes – A.Gertsen kósheleriniń qıylysyndaǵy alań jáne «Esil» ózeniniń jaǵalaýy. Atalǵan aýmaqtarda syrǵanaqtar men muz aıdyndary ornatylǵan. Aýa raıy jaǵdaılaryna baılanysty syrǵanaqtardy qaýipsiz paıdalaný maqsatynda rolıkti mehanızmi bar plastıkten jasalǵan jasandy jabyn qarastyrylǵan. Bul jabyn syrǵanaqtardy jyl mezgiline jáne aýa raıyna qaramastan paıdalanýǵa múmkindik beredi, – deıdi aýdan ákimdigi resmı saýalǵa bergen jaýabynda.

Mamandar qysqy demalysty uıymdastyrýǵa jeke bıýdjet qarastyrylmaǵanyn aıtady.

– Jalpy, elordanyń jańa jyldyq bezendirilýi men qysqy demalysty uıymdastyrý jergilikti atqarýshy organnyń bıýdjeti jáne demeýshilik qarajat esebinen júzege asyrylady. Aýdandy aǵymdaǵy bezendirý aıasynda shaǵyn sáýlettik formalardy montajdaý/demontajdaý, olardy kútip-ustaý jáne qajet bolǵan jaǵdaıda jańa jyldyq bezendirý men qysqy demalys elementterin jóndeý-qalpyna keltirý jumystary kózdelgen, – deıdi ákimdik qyzmetkerleri.

Al Nura aýdandyq ákimdigi jańa jyldyq bezendirý jumystaryna 75 mln teńge bólipti.

– «Nura» aýdanynda qysqy kezeńde Ortalyq saıabaqta, Ǵashyqtar saıabaǵynda jáne Úrker turǵyn alabynda ornalasqan úsh ashyq muz aıdyny jumys isteıdi. Bıyl qysqy demalysty uıymdastyrý úshin plastmassadan jasalǵan syrǵanaqtar qoldanylyp jatyr. Qysqy qoǵamdyq keńistikterdi daıyndaý jáne jańajyldyq bezendirý is-sharalaryn qarjylandyrý jergilikti atqarýshy organ bıýdjeti, sondaı-aq demeýshilik qarajat esebinen júzege asyrylady. Aýdanǵa qysqy bezendirý jumystaryna shamamen 75 mln teńge bólindi, – deıdi mamandar.

Saraıshyq aýdany da jańa jyldyq bezendirýge bólingen bıýdjetten qalys qalmaıdy. Bıyl aýdan ákimshiligi qala turǵyndary men qonaqtaryna 50 mln teńgege jańa jyldyq atmosfera syılaıdy.

– «Saraıshyq» aýdany – elordamyzdyń jańa ákimshilik birligi. Jańa jylǵa oraı aýdan aýmaǵynda qala turǵyndary men qonaqtary úshin tegin qysqy demalys nysandary ornatylady: muz aıdyndary, syrǵanaqtar, shaǵyn sáýlet nysandary, fotozonalar jáne ózge de belsendilikter. Negizgi demalys núkteleri: «Qazaq Eli» alańy, «Nurly Jol» vokzaly, Prezıdenttik saıabaq jáne Jumysshy mamandyqtar alleıasy. Aýdan aýmaǵynda jańajyldyq shyrshalar ornatylady, kósheler jaryqtandyrylǵan tvınklaıttarmen, ınstallıatsııalarmen jáne basqa da áshekeılermen bezendiriledi. Birqatar qoǵamdyq keńistik qysqy demalys atmosferasyn qalyptastyratyn taqyryptyq shaǵyn sáýlet nysandary men jaryq ınstallıatsııalarymen tolyqtyrylady. Qysqy bezendirý jumystaryna shamamen 50 mln teńge bólindi, – deıdi olar.

Al Almaty aýdany bıyl jańa jylǵa múlde shyǵyndalmaýdy jón kóripti.

– Qazirgi ýaqytta is-sharalarǵa eshqandaı qarajat bólingen joq. Sonymen qatar «Almaty» aýdany ákiminiń apparaty tarapynan jańa shaǵyn sáýlettik nysandardy satyp alý kózdelmegen – ótken jyly paıdalanylǵan qurylymdar qoldanylady, – delingen ákimdiktiń resmı saýalǵa bergen jaýabynda.

Aıta keteıik, Astana qalasynda bir mezette 40-tan astam jańa jyldyq shyrshanyń shamy jaǵyldy.