Demalys kúnderi aýa raıy qandaı bolady

ASTANA. KAZINFORM — «Qazgıdromet» RMQ demalys kúnderge arnalǵan aýa raıy boljamyn jarııalady. 

— Aldaǵy eki kúnde soltústik jáne shyǵys aımaqtarǵa áli de soltústik-batys tsıklony jyrasy áser etedi, sondyqtan qar, jaıaý burqasyn boljanady. Tek 28 jeltoqsanda, kezekti antıtsıklon silemimen, eldiń soltústiginde kún ashylady. Jerorta teńizi aımaǵynan keletin tsıklonnyń áserinen eldiń batysynda, 27 jeltoqsannan bastap ońtústiginde, sodan keıin ońtústik-shyǵys aımaqtarda da turaqsyz aýa-raıy bolady, jaýyn-shashyn (jańbyr, qar) jáne kóktaıǵaq bolady. Respýblıka boıynsha tuman kútiledi, eldiń soltústiginde jel kúsheıedi, — delingen habarlamada.

Sıonptıkter Respýblıkanyń kóp bóliginde temperatýra óziniń Klımattyq kórsetkishterinen joǵary bolyp turǵanmen soltústik óńirlerde aýa temperatýrasynyń túnde 7-15-ke deıin, kúndiz 5-10 gradýs aıazǵa deıin azdap tómendeýi kútiletinin boljaıdy. Eldiń qalǵan aýmaǵynda temperatýralyq fonda aıtarlyqtaı ózgerister boljanbaıdy.

Eske sala keteıik, buǵan deıin ShQO-da ekologııaǵa monıtorıng júrgizý úshin jańa datchıkter ornatylatynyn jazǵan bolatynbyz. Sebebi, sońǵy kezderi Óskemendi tuman tumshalap tur.