«Delta Bank» salymshylaryna tólem tóleý ýaqyty jarty jylǵa uzartyldy

ALMATY. QazAqparat – Qazaqstan depozıtterdi kepildendirý qory «Delta Bank» AQ salymshylaryna bakn agent arqyly tólem tóleý ýaqytyn 2021 jyldyń 23 mamyryna deıin sozdy, dep habarlaıdy QazAqparat tilshisi.

«TsentrKredıtBanki» AQ tıisti kelisimshartqa qol qoıdy.

Kórsetilgen merzim ishinde «Delta Bank» AQ salymshylary agent bankke júginip, kepildik berilgen ótemdi tóleý jónindegi ótinishti tikeleı nemese senim bildirilgen tulǵa arqyly usyna alady.

Jeke ózi kelgen jaǵdaıda salymshynyń jeke basyn kýálandyratyn qujaty bolsa jetkilikti, al senim artylǵan tulǵa keletin bolsa, quqyq belgileýshi qujattardy usynady (mysaly, notarıýs kýálandyrǵan senimhat).

Atap ótý kerek, «Delta Bank» AQ salymshylaryna kepildik berilgen tólem agent bank arqyly 2018 jyldyń 17 mamyrynan beri tólenip keledi. Eki jyldan astam ýaqyttyń ishinde jalpy somasy 102,3 mln teńge tólendi.

Bul qor mindettemeleri jalpy somasynyń 51 paıyzyn quraıdy. Barlyǵy 327 salymshy depozıtteri boıynsha tólem aldy. Bul - «Delta Bank» AQ salymshylarynyń jalpy sanynyń 12 paıyzyna teń.

Agent bank arqyly belgilengen tólem merzimi aıaqtalǵan soń, «Delta Bank» AQ salymshylary tikeleı qorǵa, dálirek onyń Almaty men Nur-Sultan qalalaryndaǵy bólimshelerine júgine alady.

Elimizdiń basqa óńirlerinde turatyn salymshylar ótinishterin jáne notarıýs kýálandyrǵan qujattaryn poshta arqyly jiberý múmkindigine ıe bolyp otyr.

Bul olarǵa qosymsha shyǵyn keltiretini belgili. Sondyqtan qor salymshylarǵa kepildik berilgen tólemdi alý úshin agent banktiń bólimshelerine júginýdi usynady.

Eske salamyz, agent bank kepildik berilgen ótemdi jeke tulǵalar men dara kásipkerlerdiń shottary, kartochkalary jáne depozıtteri boıynsha tóleıdi.

Kepildik mólsheri:

• ulttyq valıýtadaǵy qarajattar boıynsha – 10 mln teńgeden;

• shetel valıýtasynda qarajattar boıynsha (bankti májbúrlep taratý týraly sot sheshimi zańdy kúshine engen kúni belgilengen valıýta aıyrbastaý baǵamy boıynsha) – 5 mln teńgeden aspaıdy.

Salymshylar kepildik berilgen ótem alýdyń ózderine yńǵaıly tásilin: agent banktiń kassasynan qolma-qol aqshamen nemese ótinish berýshiniń bank shotyna aýdarý arqyly alýdy tańdaýǵa quqyly. Bul rette bank derektemeleri salymshynyń ótinishinde naqty kórsetiledi.