DDU koronavırýsqa qarsy revaktsınatsııa boıynsha usynymdar jasady

NUR-SULTAN. QazAqparat – Dúnıejúzilik densaýlyq saqtaý uıymynyń sarapshysy Santıago Mas-Koma koronavırýsqa qarsy revaktsınatsııadan ótý qajettigin, óıtkeni vaktsınatsııadan keıingi ımmýndyq qorǵanys birneshe aıǵa ǵana sozylatynyn málimdedi, dep habarlaıdy QazAqparat tilshisi Izvestııa agenttigine silteme jasap.

«Revaktsınatsııa kezinde egde jastaǵy adamdarǵa basymdyq berilýi tıis. Eń durysy - jańa shtamdarmen kúresý úshin modıfıkatsııalanǵan peparattarmen revaktsınatsııa jasaý. Osy oraıda sıntez protsesteriniń erekshelikterine baılanysty mRNQ vaktsınalaryn paıdalanǵan abzal», - dedi Santıago Mas-Koma.

Onyń aıtýynsha, ǵalymdar áli kúnge deıin COVID-19-ǵa qarsy revaktsınatsııadan qanshalyqty jıi ótý kerektigin anyqtaı almaı otyr.

«Bul negizinen jas toptaryna baılanysty bolýy múmkin. Mysaly, jastar úshin revaktsınatsııa ýaqyty uzaǵyraq, al egde jastaǵy adamdar úshin qysqaraq degendeı. Sondaı-aq adamnyń densaýlyq jaǵdaıyna da tikeleı baılanysty», - dedi sarapshy.

Bir kún buryn Reseı Federatsııasy Densaýlyq saqtaý mınıstrliginiń juqpaly aýrýlar jónindegi shtattan tys mamany Vladımır Chýlanov «Spýtnık Laıt» ekpesin revaktsınatsııalaý úshin nemese COVID-19 ınfektsııasymen aýyryp shyqqannan keıin saldyrý qajettigin málimdegen bolatyn.